Ayera mainta, Departamento di Transporte Publico (DTP) a anuncia e lansamento di nan website, director di departamento Teo Kock a afirma cu for di ayera nan a drenta den un era nobo di digitalisacion pa informa ciudadanonan, colaboradonan y brinda e servicio di transporte.
E departamento aki a cuminsa na 1996 y na 2012 a transforma, lo cual tabata un reto pa sali for di KPA y asina a desaroya te loke ta awendia como Departamento di Transporte Publico (DTP).
Segun Kock nan tin como meta pa desaroya y ehecuta maneho riba transporte publico den e careteranan y alabes ta hiba un control riba desaroyo cu ta tuma luga den sector vigente. Como tareanan, DTP tin conseha y concipia maneho hunto cu minister di Transporte, tene controlnan basa riba leynan di transporte publico, administra, duna conseho y tambe encarga pa traha plan logistico pa cu transporte publico na Aruba.
Ayera, nan DTP a cuminsa nan era di digitalisacion caminda nan a anuncia e lansamento di nan website “esaki ta e prome stap, no ta e ultimo. Esaki ta un stap hopi grandi pasobra pa hopi aña esaki tabata e intencion pero cada biaha tabata ser posponi,” Kock a sigura.
Igualmente, el informa cu nan ta hincando diferente informacion den e website manera leynan, LB y MB como lista di prijs pa permisonan y otro noticianan.
Di su parti, minister demisionario di Transporte, Ursell Arends, a afirma cu “esaki ta e paso den e direccion pa pone digitalisacion di DTP. ainda ta falta hopi mas pa traha riba dje pa nos por yega unda mester yega cu e departamento aki.”
Pa loke ta trata e website nobo, minister Arends a splica cu e plataforma aki lo publica regularmente noticianan, informacion relevante pero den futuro tur peticion tambe lo bay den un forma digital. Esaki ta e proceso y nos metanan den comun unda nos kier yega y sigur esaki tambe ta yuda empodera henter ekipo di DTP.”
Esaki tambe ta atende cu e necesidad di e residentenan pero tambe esun cu ta bishita e isla, manera e mandatario a señala.
Bishitando e website www.dtp.aw a haya informacion tocante peticion pa permiso di taxi caminda nan ta informa cu e procedura aki ta specificamente desaroya pa esnan cu anteriormente a entrega un peticion pa un permiso di taxi y ainda tin interes den e permiso pa haya e oportunidad pa entrega nan peticion unabes mas.
Pa inicia e proceso di re-aplicacion, nan ta pidi encarecidamente pa agrega algun documento, entre otro, un identificacion valido, prueba di number personal y un copia di e peticion anterior. E documentonan aki ta esencial pa verifica e peticion y pa sigura cu esaki wordo procesa corectamente.
Peticionnan di re-aplicacion lo wordo trata basa riba e secuencia di e fecha di peticion original. Esaki ta nifica cu nan lo trata e peticionnan den e secuencia di e aña, luna, y dia cual e peticion original a wordo entrega. Esaki ta garantisa un procesamento husto y transparente di tur peticion, manera e website a señala.
