(AP) — Departamento di Transporte Mericano riba diaranson a hacie mas facil pa Mericanonan biaha na Cuba, eliminando restriccionnan di vuelo estableci durante administracion di Trump.
E restriccionnan a preveni vuelonan di aerolineanan Mericano y charter for di bay ciudadnan Cubano otro cu Havana. Secretario di Estado, Antony Blinken a manda un carta na Departamento di Transporte riba diamars pidiendo pa revoca e restriccionnan, y e agencia a cumpli cu esaki riba diaranson.
Blinken a bisa cu habri vuelonan pa Cuba tabata ‘den sosten di pueblo Cubano y den interesnan di relacionnan internacional Mericano’. El a bisa cu unabes e Departamento di Transporte a cumpli cu su peticion, ‘servicionan aereo programa y charter entre aeropuertonan Mericano y Cubano por reanuda efectivo inmediatamente’.
Administracion di Biden a anuncia luna pasa cu lo expande vuelonan na Cuba, tuma stapnan pa alivia restriccionnan riba biaheronan Mericano na e isla, y elimina restriccionnan riba placa cu migrantenan por manda na hende riba e isla.
E administracion a bisa cu tambe lo move pa reintegra e Programa di Parole pa Reunificacion Familiar Cubano, cu tin un retraso di mas di 20mil aplicacion, y aumenta servicionan consular y procesamento di visa. “Cu e accionnan aki, nos tin meta pa sostene aspiracionnan Cubano pa libertad y mayor oportunidadnan economico pa asina nan por hiba bidanan exitoso na cas”, vocero di departamento di Estado, Ned Price a bisa luna pasa.
