Departamento di Salud ta analisa condicion di salud di habitantenan di Madiki

– Dr. Maritza Ordoñez, dokter y consehero medico na Departamento di Salud Publico a sali diaranson mainta compaña pa un ekipo di Dienst Besmettelijke Ziekte, Dienst Warenkeuring en Hygiene y GKMB, pa hunto bishita e area afecta pa awasero di diadomingo. Nan a cana hunto cu algun mandatario y hefe di departamento di Gobierno den e bario di Madiki, cla pa brinda servicio y pa haci e.o. chekeo medico unda ta necesario.

 

Meta di e bishita relampago haci pa e team medico ta pa por haci un evaluacion medico di e situacion, pa analisa si e yobida por a causa enfermedad na e habitantenan di e bario. A controla specialmente si ta nota sintoma manera “rash” of cu algun persona a haya keintura of ta birando malo. E intencion ta pa haci un bon analisis pa e ora dicidi si mester envolvi otro seccion di Departamento di Salud Publico den e trabou aki. 

 

Un di e preocupacionnan principal pa e ciudadanonan ta nan salud, hasta despues di e yobida pisa cu nos a confronta. E intencion ta pa bishita mas bario, manera Palm Beach, pa evalua e situacion di salud. Ta tene cuenta cu e gruponan di riesgo, manera nos grandinan of e muchanan chikito. Hunto cu DVG, tabatin tambe otro departamento di Gobierno presente manera Serlimar, Polis, Oficina di Prevencion di Desaster, pero tambe Cruz cora.