Ayera mainta minister di Salud y Turismo Dangui Oduber y Departamento di Salud Publico a presenta e Encuesta Nacional di Salud ‘STEPS’, cual ta manera un Censo cu ta bay cuminsa dia 4 di maart y lo caba dia 27 di mei.

Den esaki, minister Oduber a amplia cu ta un encuesta nacional di salud pa asina Gobierno di Aruba y Departamento di Salud Publico por haya data y haci un analisis di e situacion actual di e salud di comunidad.

Minister Oduber a splica cu e maneho di Ministerio di Salud ta dirigi pa mehora calidad di cuido y servicio. “Nos kier percura pa haci inversionnan continuo den cuido medico na Aruba, reduci e lista di spera. Tambe percura pa e gastonan medico keda pagabel y manehabel pa nos por keda ofrece e pakete di seguro cu nos ta keda ofrece na nos aseguradonan, y tambe un punto principal di nos maneho cu ta prevencion,” el a bisa.

Den cuadro di esaki STEPS ta hopi importante, unda na aña 2020 nan a lansa e Plan Nacional di Prevencion cu ta yama National Multisectorial Plan for Prevention of Noncontagious Diseases, cu ta un plan di aña 2020 pa 2030 y den esaki nan a atende cu diferente tema cu nan tin e deseo di ehecuta den futuro.

Un di e temanan importante tabata pa enfoca riba un ‘Healthy Lifestyle Center’, na unda cu siman pasa nan a logra presenta esey ysu apertura lo yuda tur persona na Aruba cu ta desea di adapta y cambia nan estilo di bida pa asina ta mas saludabel y pa participa den actividadnan deportivo. “P’esey nos a pensa cu e Healthy Lifestyle Center ta un instrumento caminda profesionalnan, nutricionistanan, dietistanan y dokternan lo yuda guia tur e persona cu tin e deseo pa adapta y cambia nan estilo di bida.”

Banda di esey, nan a cuminsa un otro proyecto cu ta yama ‘Jump 18’, cual ta dedica na muchanan entre 4 cu 18 aña y ta enfoca primordialmente pa nan tambe por cambia nan estilo di bida. Tambe ta existi e proyecto di ‘Scol Saludabel’ na unda “nos deseo como Ministerio di Salud ta pa nos amplia e cantidad di scolnan cu ta participa na proyecto di scol saludabel, pa asina nos por conscientisa y educa nos muchanan for di chikito caba pa kico ta e importancia pa un bida mas saludabel.”

Jeugdgezondheidszorg hunto cu Ministerio di Enseñansa, ta bay firma un MoU dentro di poco, manera minister Oduber a sigura, pa asina cuminsa amplia e cantidad di scolnan cu ta bay participa na e proyecto di Scol Saludabel.

Tambe nan ta bay haci diferente campaña di conscientisacion pa por informa y educa comunidad cu un campaña hopi mas presente den comunidad, na unda nan como ministerio conhuntamente cu Departamento di Salud, Healthy Lifestyle Center y Panamerican Health Organization (PAHO) ta bay tin e responsabilidad pa cuida e salud di tur hende.

Den e Plan Nacional di Prevencion tambe den e tempo ey nan a inclui e LV Beperking Tabaksproducten e cual ta prohibi humamento di sigaria den areanan publico locual ta un realidad. “Y nos ta contento cu varios instancia na Aruba ya caba a cuminsa adapta nan mes na esaki, unda diaranson awor nos a wordo invita pa ta presente na hospital caminda nan ta bay anuncia cu oficialmente niun hende mag di huma mas riba teritorio di hospital. Esaki ta un bunita iniciativa y nos ta spera cu tur e otro instancianan y sector priva haci uso di e mesun ehemplo cu hospital ta duna pa asina nos por combati e humamento tambe den areanan publico,” el a señala.

Manera a wordo menciona caba, dia 4 di maart diferente encuestadonan ta bay subi riba caya pa asina cuminsa haci e encuesta nacional di salud ‘STEPS’ pa lo cual el a menciona cu ta importante pa nan por haya cooperacion di comunidad pa participa pa asina e lo keda uno exitoso.

E ultimo encuesta STEPS cu a wordo haci na Aruba tabata na aña 2006 pa loke ta importante e data actualisa pa nan por haci uso di nan, guia e desaroyo, implementacion y tambe evaluacion di e Plan di Prevencion “nos ta consciente cu tin un gran parti di nos sociedad cu ta sufri di malesanan cronico, tin hopi reto na e momentonan aki pero sin data ta bay ta dificil pa nos por guia un direccion den prevencion,” minister Oduber a bisa.

Di su parti, Dahariana Evertsz di Departamento di Salud Publico a informa cu nan lo acerca na 5.122 persona entre 18 pa 69 aña di edad pa participa activamente den STEPS.

STEPS ta un investigacion cu ta wordo haci den e poblacion bao factornan di riesgo cu por conduci na desaroyo di malesanan cronico no transferibel manera cancer, obesidad, presion halto y tambe diabetes.

STEPS ta un instrumento cu a wordo crea pa Organisacion Mundial di Salud y PAHO pa por wordo usa pa colecta e data manera a wordo informa caba, pa actualisa e maneho di programa di salud y tambe pa haci intervencion pa comunidad akinan na Aruba.

E training pa encuestado ta bay cuminsa awe e cual ta consisti di tres paso: e prome lo ta un bishita cu e persona scogi door di nan ta bay haya di e encuestador na e cas mes unda nan lo yega cu nan ekiponan, nan lo midi e peso, haltura, presion, heup y cintura y di tres paso nan lo tin cu haci un test di sucu y colesterol.

Di e forma aki e organisacionnan encarga cu e salud publico por ricibi un bista actual di e salud di e poblacion di Aruba y tambe pa nan por crea y haci adaptacionnan pa comunidad.