Despues cu dianan pasa riba rednan social a publica informacion tocante personanan cu supuestamente a fayece pa via di vacuna pa Covid-19, Departamento di Salud Publico a lamenta e tipo di declaracion aki, cu segun nan mes a sigura, no ta cuadra cu e berdad.

Ta trata di un post den cual ta bisa: “Tin casonan caba di morto door di e vacuna aki na Aruba, pero…tin e info[rmacion] e riba lock. E famianan tin cu dicidi si nan ta publica, of no”.

Despues di basta comentario y share cu e post a haya, Departamento di Salud Publico a manda un comunicado di prensa pa tur medio di comunicacion den cual duna di conoce nan banda di e situacion aki.

Nan a splica cu despues di un luna cu e campaña nacional di vacunacion contra COVID-19 ta andando na Aruba, tin un total di mas cu 12.000 persona cu ya a ricibi nan prome y/of nan di dos dosis. Comunidad ta reacciona positivamente riba e vacuna, raportando efectonan secundario leve, manera dolor na e localidad di inyeccion, brasa stijf, keintura, dolor di cabes, cansancio y reaccion alergico cu a wordo trata. Te na e momento aki, e efectonan raporta ta dura entre 1 pa 2 dia. No ta tur persona ta presenta efecto secundario.

DVG a tuma nota recientemente di un ponencia cu na Aruba un of mas persona a fayece door di e vacuna y cu lo tin e informacion aki tapa.

Como instituto responsabel pa salud publico di Aruba, DVG ta lamenta di a tuma nota di e informacion aki cual no ta berdad.

DVG ta monitoria e proceso di vacunacion continuamente y si cualkier ciudadano cu ricibi e vacuna ta desaroya complicacionnan of molester no usual, e persona of famia mester pasa na Inspectie Volksgezondheid pa entrega un keho y tambe por e-mail DVG na dbz@despa.gov.aw cu tur dato y DVG lo haci e investigacion necesario pa trece claridad pa famia y comunidad henter.

Te na e momento aki, despues di a vacuna mas cu 12.000 ciudadano den comunidad, DVG no a ricibi ningun informacion for di famia, dokter di cas, hospital of IMSAN di ningun persona cu a ricibi e vacuna y bira asina malo cu e lo a fayece a consecuencia di e vacuna.

DVG ta urgi pa esunnan cu ta plama rond e informacionnan aki pa tuma contacto cu DVG y presenta cu prueba.

Como Departamento di Salubridad Publico nos ta sigui informa comunidad debidamente riba desaroyonan rond di e vacuna y ta sigui curasha comunidad registra pa por vacuna. Mas lihe nos vacuna nos comunidad mas lihe nos por disminui of stop e virus di sigui plama.