ORANJESTAD – Recientemente a sali publica un alerta di salud, dia 18 di maart 2019 pa Departamento di Salud di New Jersey, cu riba 04 di maart 2019 un biahero cu measles (sarampi) confirma na Merca a yega Newark Liberty International Airport a traves di terminal C for di Aruba.
Durante estadia di e persona aki na Aruba, e por tabata contagioso y por a infecta otronan, p’esey en espera di mas detaye di e caso aki, Departamento di Salud Publico lo cuminsa un investigacion epidemiologico en busca di casonan sospechoso, y tambe esunnan cu por tabata den contacto cu e persona aki. Sarampi ta un malesa infeccioso sumamente contagioso, cu ta keda un di e causanan di morto prematuro cerca muchanan rond mundo, asina mes cu tin vacuna sigur y efectivo pa esaki.
Sarampi ta wordo transmiti via gotanan procedente di nanishi, boca of garganta di un persona infecta. E prome sintomanan cu aparece ta normalmente despues di 7 pa 21 dia cu e persona a keda infecta. E sintomanan ta encera keintura halto, nanishi ta basha awa, wowo cora y puntonan blanco den e boca. Despues di un par di dia, ta aparece un ‘rash’ cu ta cuminsa na e cara y parti di e nek, y gradualmente ta plama pa resto di e curpa.
Cualkier persona cu tin keintura y acerca tosamento, wowo cora of nanishi ta basha awa cu of sin historia di biahe pa un pais unda tin measles, mester ta mas alerta pa sarampi prome cu e sintoma di ‘rash’ aparece. Esaki pa motibo cu un persona cu measles ta contagioso 4 dia prome cu e sintoma di ‘rash’ aparece. Ta recomenda pa vigila e personanan aki bon di cerca, y si ‘rash’ aparece, e persona mester wordo isola y investiga inmediatamente.
Recomendacion pa practicanan cu ta brinda cuido:
- Mehora e supervision riba casonan sospechoso cu ta presenta keintura y ‘rash’.
- Monitoria di cerca personanan local dentro di bo practica cu ta presenta cu sinomanan di measles.
Si un persona no por presenta prueba di vacunacion por laga check esaki na seccion Cuido Salud Hubenil. Si no tin prueba cu e persona a ricibi e vacuna por haya esaki na seccion di Malesanan Infeccioso di Departamento di Salud Publico.
Tur caso sospechoso mester wordo raporta na seccion di Malesanan Infeccioso segun Ordenansa National existente di Malesanan Infeccioso.
Pa mas informacion por tuma contacto cu seccion di Malesanan Infeccioso di Departamento di Salud Publico na 522-4221/239/241 of despues di orario di trabou na 593-0917.
