Den un comunicado di prensa cu Departamento di Salud Publico (DVG) a manda pa medionan di comunicacion, nan a informa cu Campaña di Vacunacion Nacional contra e virus di COVID-19 ta den ful movecion y comunidad mas y mas ta mira e importancia di vacuna.
Desde dia 17 di februari 2021 cu a cuminsa cu e prome vacunacionnan te cu ayera nochi dia 24 di februari un total di 18.822 persona a registra pa por ricibi nan vacuna di cual 8.022 ta personanan di edad 60+.
Un total di 2.935 vacuna a wordo aplica caba di cual 1.115 ta dunadonan di cuido y 1.820 ciudadanonan riba 60 aña.
Na e momentonan aki ta sigui vacuna e adultonan mayor di 60+ como esunnan cu tin mas risico di desaroya complicacion grave y hasta fayece pa motibo di COVID-19.
DVG ta haci un yamada na personanan adulto mayor di 60+ pa registra y asina por ricibi nan vacuna contra COVID-19, na e momentonan tur adulto mayor di mas cu 60 aña tin prioridad.
Nan ta enfatisa pa comunidad pa no laga e oportunidad pasa pa despues mester pasa dificultad pa haya vacuna, ta recomenda miembronan di famia pa ofrece yuda es cu tin 60+ pa nan por vacuna.
E proceso pa haci esaki ta door di registra riba e aplicacion Aruba Health App y keda pendiente pa e cita of tambe por yuda nan pa yega na un edificio di MFA unda lo tin personal pa atende tur persona cu mester ayudo, tur loke mester ta carnet di AZV of un paspoort si e persona ta biba na Aruba pero no tin AZV.
“Mas lihe nos vacuna un cantidad grandi di ciudadanonan den nos comunidad mas lihe nos por cuminsa flexibilisa y hasta kita medidanan di proteccion implementa” nan a señala y tambe pa cuminsa move atrobe den direccion di loke ta conoci como e tempo normal.
