Departamento di Recurso Humano: ‘Mas di 150 aplicacion caba di trahadonan publico pa bay cu VUT’

Gobierno di Aruba recientemente a pone disponibel areglo di VUT-Regeling [Vrijwillige Uitdiensttreding] pa empleadonan publico te cu dia 15 di Augustus.

Segun Departamento di Recurso Humano [DRH] e acogida ta grandi y nan tin mas cu 150 peticion caba y awor apenas a pasa e prome luna. DRH ta informa cu mas tanto di e peticionnan aki ta hendenan riba di 60 aña cu lo kier bay algun aña cu VUT y despues baha pa pensioen.

E atencion ta hopi grandi segun Omaira Lares, Director di DRH ta informa, y awor lo bolbe bay haci un otro ronde mas y ta premira cu e biaha aki lo por yega na mas di 200 peticion. E grupo di empleado publico riba 60 aña cu bay cu VUT y termina cu pensioen ta mas o menos 450 ambtenaar. Esey ta e grupo cu a faya dos biaha of lubida dos biaha, mirando cu antes por a bay cu 55 leeftijd y 30 dienstjaren, despues e 55 a cambia pa 60 aña anto bo por baha cu pensioen cu 60, pero tin cu bay te cu 65 dependiendo na bo edad y cantidad di aña di trabao. E grupo ey ta esun cu ta mas interesa pa VUT. Lares: “Pasobra traha te cu 65 aña awendia den nos ambiente tropico aki ta algo hopi pisa.”

Den e ley di VUT tin un restriccion: cual no mag resulta den ‘quantitatief’ ni ‘qualitatief’ onderbezetting, pues si bo tin 5 beleidsmedewerker anto dos di nan por bay y door di cambio di maneho berdad bo por laga 2 bay, pero no por laga tur 5 bay. Tambe tin otro restriccion manera ora bo tin hendenan cu ta Kader of HBO/WO opgeleid y nan ta haya schaarste toelage, eseynan tambe ta wordo restringi pasobra ta personal cu ta hopi schaars na Aruba. Ta papia aki por ehempel di esnan den IT of den funcionnan halto den otro departamentonan. Tin algun doño di trabao cu ta bisa di no laga persona bay aunke cu tin 63 aña of hasta si tin kebrante den salud, pasobra lo perde e formatieplaats. “Esey ta e regla y bo no ta perde esaki, bo mag di yen’e interno. Asina cu esnan cu por bay y esnan cu bo por haya un fluho unda e otronan por drenta den funcionnan halto,” segun DRH.

Plataforma Digital

DRH ta informa tambe cu otro siman lo tin un grupo di Hulanda cu lo bini cu un ‘opleidingsplan’ pasobra bo por sigui bay den e funcion, pero si bo no tin un bon preparacion, e chens cu bo no ta bay logra tambe lo ta grandi. Lo bini cu un plataforma digital unda ambtenaar por drenta y haci nan cursonan anto prepara nan mes pa e siguiente stap den nan organisacion.