Recientemente, varios cliente di Botica San Nicolas a acerca redaccion di Bon Dia Aruba, indicando cu nan no por a haya nan receta na e botica unda nan ta registra. Nos redactor a tuma contacto cu e botica, cu a indica cu e departamento cu ta tuma receta a cera. Sinembargo, e parti dilanti di e botica si ta keda habri, fungiendo como drogisterij.
Comienso di luna di maart, lectornan di Bon Dia Aruba a acerca Redaccion cu preocupacion pa e servicio cu nan ta hayando. Nan a menciona cu nan tin e problema cu ora dokter manda receta pa nan, y nan bay e botica pa busca nan remedi, ta bin haya e situacion fastioso cu e botica no tin e receta. Dokter nan manera di traha actualmente ta completamente digital, pues e pashent mes no ta ricibi un receta di papel pa hiba cerca e botica. Esaki ta pone cu algun di e pashentnan ta bay te na e botica por nada, y considerando cu ta trata di hende cu kebrante di salud y/of edad avansa, esaki ta causa hopi inconveniencia.
Awo, Botica San Nicolas desde siman pasa a duna di conoce cu nan no ta tumando receta di dokter mas. Sinembargo, e informacion no a yega cerca tur cliente.
Riba su pagina di Facebook, e botica a informa cu “pa motibo di renobacion y expansion, e Departamento di Receta Medico na Botica San Nicolas ta bay keda cera temporalmente cuminsando dia 15 di maart 2025, te cu proximo aviso.”
E post ta indica tambe cu walk-in y benta di remedi sin receta si ta continua normal, y ta solamente e Departamento di Receta Medico ta afecta.
Botica San Nicolas a pidi un sincero disculpa pa cualkier inconveniencia y ta aprecia e sosten mientras ta traha pa mehora servicio.
