Ayera por a nota riba rednan social, incluyendo pagina di Facebook di tanto Minister di Labor, Glenbert Croes, como di Departamento di Progreso Laboral, un aviso contra e necesidad di contrata un tramitador di permiso.
“Ministerio di Asunto Social y Labor ta anuncia: Ta bon pa tur hende realisa cu bo no mester di ningun tramitador pa regla bo papelnan na Departamento di Progreso Laboral DPL. Ta bon pa tur hende realisa cu e servicio di DPL ta gratis. Esun cu kier uza y paga un tramitador mester realisa cu esaki por ta un consecuencia pues cu bo ta bira victima di estafa”, e aviso ta lesa.
Den pasado, casonan di estafa cu tramite di permiso a keda reporta na autoridadnan. Na januari 2017, a acusa Nadine Melisha Buddy di fraude cu tramite di permiso. E tempo ey, a informa cu autoridadnan competente, entre nan OM y Recherche, tabata na altura di e caso pero no a actua. Ademas a bati alarma na Dimas y DPL. Entre otro, a reporta cu e persona a estafa, tumando alrededor di 40mil florin di un compania pa tramita 10 permiso, cual e no a haci.
Tambe na november 2016 tabatin e caso di ex Polis Gibbs, caminda recherchenan a bay over na detencion di e persona aki riba e sospecha cu el a comete delitonan cu ta en pugna cu nos leynan penal. Delitonan manera falsificacion di documentonan of firma falso riba documentonan of tambe ‘oplichting’ cu ta estafa.
Riba pagina di Facebook di DPL, usuario M.B. a comenta: “E comunicado aki mester wordo manda pa tur tramitador cu boso conoce. Y tur e consulnan di diferente pais cu ta traha na Aruba. Pa asina nan bisa nan paisanonan di e comunicado aki!” Mientras otro usuarionan a dirigi critica riba e departamento. Usuario J.G. a bisa ‘tanto bal, tog tur permiso ta wordo nenga’, y J.M.P. a bisa ‘Por fabor. E manera cu nan ta trata hende na DPL ta di lamenta’.
