Departamento di Mucha y Hoben (DMH) ta e instancia gubermental asigna pa carga, ehecuta y supervisa e ley di Centro di Cuido di Mucha na Aruba. Despues di mas di 30 aña, cu a presenta pa prome biaha e Ley di Centro di Cuido di Mucha na Parlamento di Aruba, e ley ta drenta na vigor, dia 15 di augustus 2023.

E ley aki a conoce alrededor di 16 adaptacion den transcurso di tur e añanan, pasando den hopi aña di discusion, colaboracion, planificacion, estudio y input di e veld mes den e periodo di 2015-2017.

Finalmente dia 15 di juni 2017, a bolbe presenta e ley adapta na Parlamento y a haya aprobacion un biaha mas. Na e momento ey e meta tabata ta, pa e ley drenta na vigor dia 1 di juli 2018. Sinembargo e ehecucion no tabata uno asina facil pa implementa y a pesar di tur e preparacion-, discusion, documentonan traha, e ley a encontra su retonan pa realmente drenta na vigor.

Punto di Salida

Na 2001 Aruba, como pais, tambe a firma e Tratado aki, haciendo asina e compromiso pa proteha di un forma mas completo posibel, e desaroyo di e mucha den su personalidad, talento, capacidad emocional, mental y fisico. P’esey e punto di salida di e ley di centro di cuido di mucha ta basa riba e Tratadonan Internacional di Derecho di Mucha, specificamente e articulonan 3, 6 y 12 y siguientemente Aruba a percura pa e tin su mesun normanan y a traha e Ordenansa Nacional Centro di Cuido di Mucha (AB 2017 no.38).

Den Ordenansa Nacional di Centro di Cuido di Mucha tin 4 decreto nacional (Lbham) cu ta imperativo y mester ta cla, pa ehecucion di e ley;

articulo 8 inciso 2; regla adicional di registro di centro di cuido di mucha;

articulo 21, inciso 2; regla adicional di exigencianan pa un procedemento di keho;

articulo 23, inciso 6; regla adicional di contenido y transmision di supervision;

articulo 27, inciso dos; regla adicional di e.o. last onder dwangsom y boet administrativo (bestuurlijke boete).

Banda di e 4 decretonan nacional tambe mester tin 2 regulacion ministerial: manual di regulacion di exigencia di calidad di cuido di centro di cuido di mucha y regulacion di formulario di peticion pa haya permiso pa opera un centro di cuido di mucha.

DMH ta sigur cu nos niun por imagina e sociedad Arubano sin cuido di mucha mas y cuido di mucha ta importante pa tur hende; mayornan, dunado di trabou y gobierno. Cuido di mucha ta promove un crecemento di participacion laboral y ta duna e mayornan tambe e oportunidad pa combina otro actividad social cu educacion.