Departamento di Mucha y Hoben (DMH) a prepara un dia di recapacitacion pa sigui brinda sosten y guia na su 56 Supervisornan di Codigo, den nan trayecto di profesionalisacion y experticio riba e topico di maltrato/abuso di mucha. Actualmente DMH tin 56 Supervisornan di Codigo, cu ta staciona dentro di 35 instancia na Aruba: 9 den area social, 4 den area di husticia, 7 den area di enseñansa, 12 den area di salubridad y 3 area recreativo.
Durante e mainta aki por a conta cu presencia di 41 Supervisor di Codigo (90%), unda cu nos propio profesionalnan local a brinda e contenido basa riba sugerencia di tema di e Supervisornan di Codigo.
DMH a presenta su plannan di Centro di Experticio Digital cu ta den pleno construccion cu guia tecnico di LVAK di Hulanda y kico ta e plannan pa 2025 en adelante. LVAK tambe a pasa den e mesun proceso cu DMH, unda cu 12 aña pasa nan a cuminsa cu a penas 40 Supervisor di Codigo (Aandachtfuntionaris) y awendia tin mas di 3000 cu anualmente ta haya recapacitacion di nan y tin acceso como miembro na nan biblioteca digital, workshop etc.
Sr. Johny Boekhoudt, Supervisor di Codigo na OC (Ortopedagogisch Centrum) den su ramo di experticio como psicologo, a presenta e topico di “Ouder Verstoting” (rechaso di mayor), unda cu e profesionalnan a keda sumamente contento cu e contenido local y tips balioso tocante con pa anda cu esaki, specialmente den paso 3 di CdP.
Siguientemente tabatin un sesion di panel tocante cuadro huridico y experto den comportacion, unda cu DMH a invita 3 profesional pa asina comparti nan perspectiva, conocemento y experticio basa riba e preguntanan cu e SdC tin. Ta trata di sra. Audrey Kan, psicologo clinico y propietario di Aruba Clinical Services, sr. Elvin Zara, representando JZP y sr. Jermin Bell ‘opvoeddeskundige’ na MDC.
Despues a sigui cu ‘good practice’ presenta pa e Supervisornan di Codigo di e instancianan SKOA (cu tin rond di 400 maestro trahando cu CdP) con Codigo di Proteccion ta cana den nan instancia y con nan ta percura pa keda motiva, instrui, educa nan coleganan pa haci uzo di e 5 pasonan di CdP como e Toolkit CdP digital. Un momento masha aprecia y di admira pa tur otro SdC, dunando un bon bista con dos instancia ta anda y salvaguardia Codigo di Proteccion.
DMH ta gradici tur e profesionalnan cu tabata presente y lo sigui stimula y empodera e profesionalnan den nan rol di Supervisor di Codigo y lo sigui crea dia di recapacitacion relevante pa nan keda bon ekipa. Hunto nos por sigui traha pa crea mas siguridad y proteccion pa nos mucha- y hobennan na Aruba.
