Departamento di Impuesto tocante Grondbelasting; DIMP ta recomenda pa registra propiedad; de lo contrario lo fiha balor segun nan criterio

Departamento di Impuesto a duna di conoce diahuebs ultimo informacion di loke tin di haber cu grondbelasting, e cifra cu personanan tin cu paga di acuerdo na e balor di e propiedad y con por haci un areglo di pago den caso di no por cumpli cu e pago estableci cada kwartaal.

Meverly Romaro, PR di e departamento aki, a splica cu grondbelasting ta un tipo di impuesto den e sistema actual cu tur persona cu ta doño di un propiedad inmobil tin cu paga y tambe ta encera e personanan cu kisas no ta e doño di e propiedad pero si nan a adkiri cierto derechonan riba e propiedad.

El a pone como ehemplo, esunnan cu tin un derecho di erfpacht cu nan a adkiri di gobierno y cu e personanan aki tambe lo mester paga grondbelasting, tambe tin esunnan cu tin e vruchtgebruik riba un tereno inmobil, nan tambe lo mester paga grondbelasting.

Grondbelasting ta wordo calcula na base di e balor di e propiedad, segun loke Romano a specifica y den esaki nan ta tuma como punto di salida e balor riba mercado.

“Esaki ta hopi importante pa nos por stipula e balor di e propiedad” pa motibo cu na base di e balor di e propiedad nan tin cu calcula kico ta e suma di impuesto cu e persona mester paga.

Un bes cu nan ta stipula e balor di e propiedad, esey ta conta pa cinco aña, loke ta nifica cu nan semper ta mantene un periodo di cinco aña y e periodo cu ta andando awor ta esun for di 2017 te cu 2021.

Di e forma aki nan ta calcula e balor pa cinco aña y e impuesto lo keda igual pa e cinco añanan aki, pa cada periodo aki tin e posibilidad cu por haci un rebaloracion y den ora ey nan ta wak ki ta bira e suma nobo di impuesto cu e persona tin cu paga.

Durante cinco aña departamento di Impuesto lo mantene a balor, manera Romano a menciona caba pero si durante e cinco aña aki bin un cambio drastico den e balor di e propiedad, e ora ey si por resulta cu e suma di impuesto ta cambia.

Esaki ta sucede ora cu por ehemplo, a bin un renobacion y tambe ora un cas a wordo destrui pa candela of el a wordo destrui door di un mal tempo, tambe por haya cu un propiedad ta cambia di destinacion, cu por a cambia di residencial pa comercial, den casonan aki por haya un cambio den e balor di e propiedad.

E tarifa di grondbelasting den e sistema actual ta depende di e balor di e propiedad, pa personanan residencia na Aruba e tarifa ta varia entre 0% te cu 0.6%, esunnan cu ta paga 0% di impuesto segun Romano a sigura, ta esunnan cu nan propiedad tin un balor di 120.000 AGW of menos.

Esunnan cu ta paga di 0% pa 0.6% ta esunnan cu nan balor di propiedad ta 750.000 AWG of mas, asina ey nan tin diferente tarifa y tur ta depende di e balor di e propiedad.

Pa personanan cu no ta residencia na Aruba, pa nan e tarifa ta fiho loke ta representa 0.6% di e balor di e propiedad y tambe pa parcelanan cu ta comercial tambe e tarifa di grondbelasting ta e mesun cifra.

Tocante e cobransa di e impuesto aki, Romano a bisa cu ta uno cu departamento di Impuesto ta saca tur aña den e periodo aki, e ta un cobransa cu tur persona cu tin un propiedad inmobil ya ta custuma cune caba, “nan sa cu den e periodo aki nan por espera un cobransa y e aña aki esey ta e caso tambe”, Romano ademas a comenta cu nan a caba di saca e cobransa di 2021, cu tin un fecha oficial di 31 di mei y e prome termino di pago ta caduca aki un luna cu ta dia 30 di juni.

E ley di grondbelasting ta permiti pa haci e pago di e impuesto aki den termino, cada termino ta igual cu un kwartaal di aña y cada termino ta vence na final di e kwartaal loke ta nifica cu aworaki nan tin e prome mita di aña cu ya ta bayendo cu cobransa y tin fecha di 31 di mei.

Tambe segun e ley, e personanan lo mester paga 50% di e suma pa dia 30 di juni.

E siguiente 25% ta e siguiente kwartaal of na final di e kwartaal cu ta dia 30 di september y di loke ta trata e ultimo termino cu ta caduca dia 31 di december lo mester wordo paga dia 3 di januari.

Romano a expresa cu por sucede cu e cobransa ta di tal forma cu e contribuyente no por haci su pago di acuerdo cu e terminonan legal, den esaki departamento di Impuesto ta duna e facilidad na e contribuyentenan pa haci un areglo di pago, den esey e contribuyente por haya mas espacio, un termino mas largo pa asina e por cumpli cu e pago di e cobransa aki.

Na e momentonan aki, Romano a informa cu nan tin e plan di alivio fiscal vigente caminda cu nan ta duna e facilidad di pagonan flexibel cu periodonan mas largo de un tempo mas largo cu 12 luna, esey tambe ta depende di kico e contribuyente a scoge.

Pero nan ta recomenda pa e contribuyentenan pa no keda sin actua, pa motibo cu nan sistema automatisa ta wak e fechanan y cada fecha cu vence ta wak si tabatin pago y si no tin un pago registra, e sistema ta cuminsa procesa un recordatorio y asina e cliente ta cuminsa hayel’e na unda ta indica cu e tin un pago pa haci.

“E contribuyente cu tin un cobransa cu ta habri ainda, nos ta recomenda semper pa cumpli cu e pagonan manera ley ta bisa of haci un areglo di pago” Romano a indica.

Pa esunnan cu no a ricibi un cobransa di grondbelasting pero cu si tin un propiedad cu kisas no ta registra na departamento di Impuesto ainda, nan ta recomenda pa e personanan aki registra nan propiedad, nan tin un formulario riba nan website cu tas yama ‘Registratie onroerend goed’ y e persona por haci uso di dje.

Tambe nan ta pidi e documentonan relevante pa nan por stipula e balor di e propiedad, pa asina nan por duna e propiedad ey un balor cu ta real, de lo contrario departamento di Impuesto lo bay fiha un balor segun nan propio criterio y e cobransa lo bay sali y cobra te e cinco aña atras cu posiblemente lo por sali cu un multa tambe.