Recientemente na redaccion di Bon Dia Aruba a drenta comentario di ciudadanonan preocupa cu diferente asunto relaciona cu Departamento di Impuesto. Entre otro, cu ta hopi dificil pa haya contacto cu e departamento riba telefon.
Pa cu esaki, Bon Dia Aruba a cerca vocero di DIMP, Meverly Romano.
Tocante dificultad pa haya contacto cu DIMP riba telefon, Sra. Romano a bisa cu nan tin un team cu ta contesta telefon constantemente, pero e volumen di yamada ta hopi grandi, y tin biaha e persona ta keda un poco largo na telefon door cu tin diferente pregunta. “Nos ta purba si di mantene e yamadanan mas cortico posible pa asina otronan cu ta wardando por yega na turno mas lihe,” Romano a indica.
Tambe ta e caso cu por tin menos personal disponible pa contesta telefon riba un dia specifico, “sea pa motibo di vakantie of malesa, y esaki ta causa cu pa atende e yamadanan por dura mas largo.”
Romano ta recomenda si acaso un persona tin algo urgente pa atende cune, cu por purba yama back, of manda un e-mail na info@impuesto.aw y indica su situacion.
Mirando cu recientemente a sali den noticianan local un declaracion di DIMP, indicando cu a cuminsa duna restitucion pa aña 2023, lectornan a acerca Bon Dia Aruba pidiendo mas informacion riba esaki. E motibo tabata cu segun nan a indica, ainda tin persona ta wardando restitucion pa aña 2022.
Pa cu esaki, Romano a contesta cu a cuminsa cu e proceso pa duna restitucion pa 2023. “Mientras tanto, nos ta trahando tambe riba 2022. Mayoria bes esakinan ta casonan di personanan cu a entrega nan aangifte laat, of recien nan a wordo registra of nan caso ta rekeri mas investigacion.”
Romano a bisa cu un otro motibo por ta tambe cu e aanslag a sali, pero e restitucion a keda atras debi cu e number di cuenta di banco no ta corecto, of e departamento no tin esaki. “Nos ta haya hopi cliente cu ta cambia di banco y no ta cambia e rekeningnummer cerca nos,” el a indica.
Pa esaki, ta recomenda cada cliente tuma contacto cu e departamento y check cu tur detaye ta corecto cerca nan.
