Departamento di Impuesto ta habri awe pa publico por paga plachi di number

Departamento di Impuesto awe 18 di januari nan lo habri e caha di oficina na Camacuri pa publico desde 8or di mainta te 2or di atardi pa asina duna oportunidad pa esunnan cu te ainda no a paga nan number di auto.

Meverly Romano vocero di Departamento di Impuesto a duna di conoce cu esaki ta dianan hopi druk y hunto cu cooperacion di minister di finansa nan a haya aprobacion pa duna servicio awe diasabra.

Di loke ta trata e oficinanan den districto MFA el a informa cu e pago ta bayendo hopi bon, tanto asina cu nan mester duna number limita pa motibo cu mester tene na cuenta e orario di e oficinanan aki, pa e motibo aki algun biaha personanan ta haya molestia pero e edificio mester cera na su ora.

Asina mes, Romano a declara cu nan tin un grupo grandi cu ta paga nan impuesto via on-line, e situacion cu a presenta e aña aki ta cu e plachinan ta yega mas laat cu di custumber y pa evita cu polis ta bay controla of duna e persona un boet e ora ey e mester tin su recibo di departamento di Impuesto cune, p’esey nan ta pidi pa clientenan cu si nan a paga via banco mester bay busca nan recibo na e oficina di departamento.

Tocante esaki, Romano a bisa cu a trece hopi critica pa motibo cu clientenan a cuminsa keha cu departamento ta obliga pa para den rij dos biaha : uno pa busca recibo y otro pa ora e plachinan a yega.

E idea di esaki ta, Romano a declara cu ta pa evita cu clientenan lo haya boet si acaso ta existi un control di polis, el a splica cu recibo di banco ta referi pa un pago pero no ta determinante pa motibo cu por influencia e descripcion cu tin riba dje, pa evita incidentenan nan ta bisa cu cliente mester busca su recibo.

E solucion cu nan a propone ta cu clientenan tin cu manda un e-mail via info@impuesto.aw y departamento di impuesto ta manda e recibo via e-mail tambe, ademas el a laga sa pa publico en general ora nan ta manda un e-mail cu datonan confidencial warda esey den un luga sigur.

Romano a menciona cu dentro di poco nan lo lansa un sistema riba nan website na unda e clientenan yena e datonan y haya su recibo, pero te ainda esey no ta cla pa su uso.

Na e momentonan aki, Romano a trece dilanti cu ta existi clientenan cu ta paga via banco y algun di nan no ta registra e pago di biaha den nan sistema pa motibo cu te ainda algun banconan no ta sincronisa cu e sistema di departamento di impuesto, Aruba Bank y CMB ta e dos banco cu si ta acepta pago di biaha.