E ultimo dianan ciudadanonan ta hayando post atrobe di Departamento di Impuesto unda por constata cu ta trata di cartanan di basta luna pasa. Pero e sospecha ta cu tin un wega cu e departamento aki ta hunga cu e fechanan, cual tin consecuencia legal.
Pa basta aña ciudadano ta keha cu ta tin un tardanza den e post di belasting. Aangifte nan ta yega laat y tin biaha asina laat cu e tempo pa apela esaki (bezwaarschrift) ya a pasa. Ora di bay reclama na Departamento di Impuesto e contesta mayoria biaha ta mester bay postkantoor pa reclama. Y cu no ta e departamento cu ta manda e cartanan laat si no tin problema cu post.
Un par di aña pasa e departamento mes a busca un alternativa como cu post tabata perdi hopi papel di belasting y of tabatin un tardanza di lunanan pa e papelnan ta yega su destino. Asina esaki tabata crea e situacion cu miles di hende no a ricibi por ehempel e formularionan pa haci aangifte.
Sinembargo e alternativa aki, segun Bon Dia Aruba a compronde, a bira mucho costoso y Departamento di Belasting a dicidi di uza Post Aruba atrobe pa manda nan corespondencia. Aunke nan ta na haltura cu Post Aruba no ta funcionando y berdad tin tardanza den e suministro di post.
Pero awor tin e indicacion cu no tur cos ta e ‘fout’ di post. Siman pasa un cliente a ricibi un carta cu tabatin e fecha 31 di augustus 2016. Riba e mesun dia y na e mesun adres a ricibi otro papelnan di belasting cu fechanan di februari.
Ora e clientenan a bay reclama na e Departamento di Impuesto, nan a ripara cu e splicacion no ta cuadra. Na prome instante e comentario oficial tabata atrobe cu e departamento no por yuda y mester acudi na Post Aruba. Ora a hala atencion riba un carta ricibi na augustus cu e fecha di 11 februari, mientrastanto na maart ya a ricibi un carta (cu e mesun contenido) cu e fecha 14 di februari, e contesta a bira hasta dudoso. Segun e ambtenaar e carta di 11 februari ta den e estilo nobo (color blauw) cu awor nan a cuminsa manda cliente. E carta di 14 di februari tabata den e estilo bieu ainda.
Ora a puntra un splicacion con por manda un carta den estilo mas nobo pero cu un fecha mas bieu, e ambtenaar no kier a comenta mas y a referi na inspector di belasting pa eynan entrega un keho. E misterio di e otro carta cu tin un fecha den futuro (31 di augustus 2016) tampoco a wordo aclaria.
Bon Dia Aruba ta purbando di haya un comentario oficial di Departamento di Impuesto riba e bruhacion cu e fechanan. E fechanan ta importante manera bisa, pa motibo cu tin un termino pa entrega bezwaar den caso cu bo no ta di acuerdo cu un decision di e departamento.
