Ya caba e fecha di cobramento di impuesto di vehiculo di motor pa aña 2020 ta cerca. Un periodo cu ta bira un pesadiya pa e contribuyente, pero tambe pa e departamento di Impuesto. Locual e departamento aki ta evaluando caba, manera tur aña, con nan ta bay haci pa por otorga mas cu 88 mil plachi di vehiculo di motor di un manera structura.

E departamento ta mantene e pensamento -a base di e team di maneho cu nan tin- cu e departamento aki no ta un negoshi di otorga plachi di number di auto. Directora di e departamento, Luenne Gomez-Pietersz ta haya cu e departamento di Impuesto su funcion principal tin di haci cu garantisa entrada di impuesto den caha di gobierno.

E ta haya cu pa e departamento aki, e asunto di pago di impuesto di vehiculo di motor lo resulta mas facil, si e belasting aki ta inclui den e accijns. Pero e opcion of posibilidad aki ainda ta den e mesa di discusion.

Nan a yega di discuti e cifra cu minister presidente y minister di finanzas, buscando e facilidad pa kita e cobransa di impuesto di vehiculo di motor for di departamento di Impuesto.

Otro opcion ta esun cu tin na Corsou por ehempel, caminda un plachi di number tin un vigencia mas largo, caminda e auto por core te 5 aña maximo cune. Mientras cu e impuesto ta wordo paga anualmente segun e terminonan den ley. E di tres opcion lo ta otorgamento di e plachi di number di vehiculo di motor tur aña pa bo sigura e cumplimento di impuesto. Pero tambe e cumplimento di seguro di auto.

Tin casonan cu nan mester bay mas stricto, ora cu deliberadamente nan clientenan no ta cumpli cu nan compromiso di paga nan impuesto. E deseo di e departamento aki ta cu nan contribuyentenan pasa di un pago obligatorio pa un pago boluntario.

Ora cu nan ta wak e falta di cumplimento ora ta trata impuesto di vehiculo di motor, caminda nan tin casi 7 mil plachi cu no a wordo paga, e pregunta cu ta surgi ta si nos ta cumpliendo cu Aruba. Gomez-Pietersz sa cu pagamento di impuesto no ta algo cu ta bin di mes. Tampoco e no ta algo cu ta placentero, pero nos tur tin cu contribui y paga cu nos compromiso fiscal, si nos kier pa nos pais progresa.

 

Efecto positivo.
Un efecto positivo cu e departamento aki ta mira, tin di haci cu e hecho cu nan a switch di sticker pa plachi bek, locual a haci cu e cumplimento pa cu e pago di impuesto pa vehiculo di motor a subi

Gomez-Pietersz ta consciente cu aña pasa, nan a haya basta critica di e clientenan cu a para den rij pafo y den solo. Te hasta nan mester a amplia nan servicio te oranan dia anochi, locual ta nifica basta gasto envolvi pa nan departamento y gobierno.

Departamento di Impuesto tin cierto grupo di trabou caminda nan a sinta cu e companianan di seguro pa wak con nan por link nan data cu sistema di impuesto. E posibilidad aki lo facilita eficiencia ora ta trata pago di impuesto, pero tambe seguro.

Directora di departamento di Impuesto ta admiti cu internamente ora cu tin cambio, no tur cos ta resulta facil pa nan team di maneho, pasobra cambio ta trece cierto resistencia cune. No solamente cerca nan contribuyentenan, pero tambe internamente, caminda nan tin cu convence tambe e empleadonan publico cu nan tin pa traha di un forma mas eficiente, structura, modernisa y brindando un servicio eleva na e clientenan.