Departamento di Impuesto: ‘Si e producto tin un prijs, ta esey tin cu paga na caha’

Departamento di Impuesto (DIMP) a splica tocante e situacion di algun comerciante/ negoshi cu ainda no ta cumpli ley. Tambe tocante algun otro sistema riba cual ta trahando pa facilita control.

Managing director di DIMP, Luenne Gomez-Pieters a bisa cu for di 2019 a drenta den vigor e cambio di sistema bou cual tur comerciante tin obligacion pa ley pa pone e prijs di un producto incluyendo e belasting BBO, BAVP, BAZV. Den ley ta prohibi pa pone e tres belasting aki riba e factura.

A puntra Gomez-Pieters pa comenta, mirando cu ainda tin situacion di algun restaurant, fast food of supermercado cu ta pone un prijs y manera cu yega na caha ta agrega extra den e prijs. A puntra si esaki ta castigabel pa e negoshi y si lo haci algun tipo di control.

Sinembargo, e ta comenta cu ora e ley a drenta na vigor, tabatin diferente comerciante cu a drenta den un situacion dificil pa cambia nan sistema. DIMP a bay delibera cu nan finanzas conhuntamente cu minister di Finanzas, pa asina dicidi y duna un prolongacion pa por adapta nan sistema.

Esey a haya un prolongacion un biaha te cu dia 1 di october ultimo, a yega na e conclusion cu minister di Finanzas y comerciante pa e prome parti di cambio keda vigente. Esey kiermen cu no por duna otro prijs na consumidor caminda BBO, BAVP y BAZV no ta hinca den e prijs.

“Si e producto ta costa 50 florin, esey e consumidor tin cu paga ora e yega su caha. Mirando cu comerciante a vocifera cu nan kier specifica e suma di locual ta cobra di belasting riba e factura; pero tin cu menciona, no mag un otro porcentahe, ta e 6% nos conoce. Nan tin tres opcion aproba pa haci esey”, el a splica.

E opcionnan ta disponibel riba nan website. Gomez-Pieters ta expresa cu tin comerciante cu a cambia nan sistema y ta haciendo e manera corecto pa cumpli cu ley. Pero tambe tin comerciante cu no ta haciendo esey.

“Compliance kiermen cu nos ta cumpli cu regla manera ley ta stipula. Den caso cu comerciante no tene su mes na regla, e ta ricibi un boet cu ta impone na momento cu bay controla. Nos ta dunando espacio pa fin di aña na comerciante cu ainda no a cambia nan sistema y a haciendo robes”, el a duna di conoce.

Comerciantenan tin te cu entrante 1 januari 2020 pa por ahusta y asina ora DIMP bay controla, no tin boet pa e negoshi. Gomez-Pieters a duna e ehempel di Corsou, unda tabata haci control ora di cambio di porcentahe y a bin cu un ‘cash register system’, caminda e consumido por deposita su factura si e ripara cu no ta cumpli cu e ley.

DIMP lo bin cu campaña, unda lo pidi cooperacion di e consumido si detecta algo cu no ta corecto, nan lo por entrega keho di esaki cerca nan, y nan lo bishita e negoshi en cuestion.

Sinembargo ta pidi si pa e consumido cu bay un restaurant of supermercado, nan ta wak un prijs y ora nan bay paga ta wak cu otro, pa nan por sa cu no ta cumpli cu regla. Nan por puntra tambe dicon e ta pagando un suma diferente, nan por duna keho.

Gomez-Pieters a comparti cu tin un suma maximo den e ley di 10.000 florin di boet pa esunnan cu no ta cumpli. Nan ta bay campaña di control entrante otro aña, di un manera stricto. “No solamente DIMP mester atende cu obligacion y regla, pero comerciante a haya su tempo pa adapta na e cambio di ley y nos tur ta cana den compas ora ta trata cu obligacion di impuesto”.

Un consumidor ta keda liber pa reporta cosnan cu no ta bay bon den practica. Nan ta delibera con por structura esey. Segun Gomez-Pieters, awendia ta facil pa en bes di trece factura por saca un potret y mand’e via whatsapp na e number disponibel di departamento, pa reporta un situacion. Den campaña lo structura pa e consumido tin control y ta consciente di locual e ta cumpra y di e manera cu ta paga na caha.

Sinembargo, e por bay cu e consumido por scoge di no cumpra su producto na cierto luga. Tin mercado liber pa paga e prijs, pero ta bon pa raporta e negoshi na DIMP si no ta cumpli cu ley.

E ta splica cu ta nan trabou pa controla negoshi su administracion, y nan lo hacie di nan banda. E ley di cambio, entrante 1 januari, ta pa proteha e consumido caminda e ta bay haya e prijs cu cambio.

Directie Economische Zaken lo por haci tambe hopi mas cu control di prijs, caminda cu consumidor por mira e prijs na diferente luga y compara e prijsnan cu ta cobra na caha.

“Nos tin mercado liber, pero nos kier pa tur hende cumpli cu impuesto y regla ora ta trata di ley di impuesto. Esey ta nos trabou, caminda nos ta mira cu negoshi cu no ta cumpli, nos mester por actua y naturalmente cu regla di pone boet, cu nos lo bay cuminsa implementa”, el a finalisa splica.