Departamento di Impuesto na comerciante chikito: “Tanten cu bo benta ta 84.000 florin of menos, bo por bin na remarca pa KOR”

Ayera mainta Departamento di Impuesto a tene un conferencia di prensa pa splica tocante areglo pa comerciantenan chikito, Kleineondernemersregeling (KOR), splicando cua ta bin na remarca y cua negoshi no ta inclui.

Meverly Romano, PR di Departamento di Impuesto, a trece dilanti cu esaki ta un facilidad fiscal cu a drenta na vigor na aña 2019, pues tin un par di aña trahando cu esaki y e ta regla den articulonan di ley di BVO, BAVP y BAZV.

E areglo pa comerciante chikito, segun Romano a trece dilanti, ta dirigi pa comerciantenan chikito y cu ta valido solamente pa esnan cu tin un empresa propio (Eenmanszaak), cu ta por ehemplo taxista, autobus chauffeur, persona cu tin un restaurant chikito, etc.

Romano a bisa cu e ley ta splica ken ta esun na bin na remarca y tambe ta indica cu mester ta un persona cu tin residencia na Aruba; e negoshi mester ta na Aruba estableci y ademas e compania no mag di tin un volumen di benta di mas cu 84.000 florin pa aña.

“Tanten cu bo benta ta keda 84.000 florin of menos, e comerciante lo por bin na remarca pa pidi pa e areglo aki” Romano a bisa.

Tambe e ley ta indica e condicionnan y tambe excepcion na comerciantenan cu por ehemplo, ta negocia cu un real estate, esunnan cu ta huur un pida di un luga, esunnan cu ta huur un cas of un camber manera Airbnb, nan no ta bin na remarca pa KOR.

KOR ta duna na e comerciantenan chikito un oportunidad na unda cu no tin mester di paga BVO, BAVP ni BAZV durante henter e aña. Esey ta nifica cu e deber di cumpli cu e declaracion di haci pago tur luna manera otro comerciantenan e no ta bay tine.

“Esaki ta un alivio hopi grandi pa e comerciantenan aki, pa motibo cu si den un luna nan a genera 5.000 florin di benta, di e placa ey e tin cu paga 300 florin na belasting. E placa ey e ta retene den su negoshi pa e cumpli cu otro inversionnan cu tin of otro gastonan”, el a sigura.

Romano a enfatisa cu ta hopi importante pa e comerciantenan aki pa nan keda mantene un bon administracion, pa motibo cu na final di aña nan lo mester haci loke nan ta yama un ‘jaaraangifte’ caminda nan ta declara kico tabata nan ganashi di henter e aña. Aki e inspector ta bay check si e persona aki a yega na 84.000 florin, el a keda bao e cifra aki of el a surpas’e.

Si acaso e comerciante a surpasa e cifra aki, e ora ey departamento di Impuesto ta bay cobr’e riba e cifra di diferencia. No ta bay haya multa sino cu solamente nan lo cobra BVO riba e cifra di diferencia. E consecuencia ta, segun Romano a declara, cu unabes e compania a bay asina bon cu el a surpasa e 84.000 florin, e lo perde su status di KOR pa e siguiente aña y tur luna e lo mester haci declaracion di KOR, di BVO y haci e pago corespondiente, el a finalisa.