Departamento di Impuesto a duna di conoce cu den temporada aki nan a bin trahando hopi duro, ademas cu nan a bin enfocando riba nan proyecto di digitalisacion.

Director di Departamento di Impuesto, Luenne Gomez-Pieters a señala cu nan a digitalisa e mayoria di nan formulario. Di esaki el a trece dilanti cu desde november di aña pasa nan a anuncia cu nan tin un portal digital pa tur comerciante of contribuyente cu tin actividadnan economico, pa asina nan por entrega nan formulario di impuesto di un manera digital.

Gomez-Pieters a anuncia cu nan tin 7.505 compania of contribuyente cu tin actividadnan economico registra na e portal. Esaki ta specificamente pa entrega formulario di impuesto mensual, manera loonbelasting, BBO, entre otro. Tur negoshi cu tin actividad economico mester registra nan mes.

Di esaki, el a anuncia cu desde luna di juli nan lo no otorga ni un formulario mas di papel. Di mesun manera el a comenta cu te ainda tin chens pa registra via website of manda un e-mail pa haya un cita na boi@impuesto.aw of yama na 522-7437, esaki ta e liñanan pa registracion di negoshi pa cu formularionan digital. Unabes cu e contribuyente of compania ta registra den e portal, e lo haya su mesun nomber di usuario y password.

Gomez-Pieters a bisa cu nan tin mas 100.000 client compliance den nan sistemanan cu Departamento di Impuesto tin cu monitoria pa loke ta trata entregamento di formulario, pero tambe e pago di impuesto. Ora ta trata cumplimento, Gomez-Pieters a expresa cu departamentonan asigna ta esunnan cu ta controla formularionan cu a wordo entrega, si nan ta corecto. Tambe nan tin funcionarionan publico cu ta encarga cu cobransa di impuestonan cu a wordo imponi y cu no a wordo paga.

22 funcionario ta esunnan cu ta atende cu cobransa y 10 deurwaarder ta atende cu un cobransa ora cu esey no ta wordo atendi cu e cliente, pa loke ta bira un cobransa forsa.

Ademas, el a trece dilanti cu departamento di Impuesto tin un rol hopi grandi, mirando cu nan no solamente tin cu facilita pa nan clientenan proyectonan como di digitalisacion, pa asina nan por cumpli cu nan debernan di impuesto. Pero tambe tin cu duna guia y apoyo pa esunnan cu lo no por cumpli debi na e situacion cu henter mundo ta pasando di Covid-19 y cu nan ta un tiki mas flexibel cu areglonan di pago. Di otro banda nan no por laga cu entradanan di caha di gobierno collapse.

Pa finalisa, el a recorda e suma di impuesto cu tabata habri, cu na aña 2015 tabatin un cifra di 2.2 miljard di entrada di impuesto cu no a wordo cobra. Na e momentonan aki a baha te 1.6 biyon florin pa via di e trabou cu e departamento a bin eherciendo.