Departamento di Impuesto lo haya instrumento legal pa cuminsa cobra number di auto atrasa

– Pa atende cu e automobilistanan cu no ta cumpli debidamente cu su compromiso di paga e respective impuesto di vehiculo di motor, lo bin cambio den ley pa facilita nan cumplimento di nan deber ciudadano. E siman aki lo bin cu instrumento legal pa departamento di Impuesto por impone tipo di boet pa esun cu no a cumpli na su debido tempo cu e pago di impuesto di vehiculo di motor. 

Ta asina cu e siman aki ta wordo trata den Parlamento un cambio cu gobierno ta propone pa haci e ley aki mas aplicabel y moderno. E intencion tras di esaki ta pa e departamento concerni lo por tin mas instrumento pa nan por yuda e doñonan di vehiculo pa nan por cumpli cu e obligacion di e lei aki mas cabalmente di loke tabata antes.

Di otro banda e mandatario encarga Angel Bermudez a bisa cu e cumplimento pa loke ta e ley di pago di impuesto di vehiculo di motor ta basta bon. Pero a pesar di esey nan kier modernisa e ley aki e tin entendi for di griffier di Parlamento cu e siman aki of prome cu Parlamento lo baha cu reces, nan lo trata e cambio di ley aki.  Segun e mandatario a declara na Bon Dia Aruba, e no ta un cambio hopi grandi pa loke ta trata e contenido di e concepto, pero e ta importante si pa e ley existente.

Instrumento legal 

E cambionan aki tin di haber cu e control administrativo ta bira mas miho. Tambe e departamento di Impuesto lo haya instrumento legal ora cu un hende no cumpli. Nan lo por pone un “naheffingsaanslag” of multa pa formalisa e parti cu e ciudadano no a cumpli cu impuesto. Of sea cu e doño di vehiculo mester cumpli cu e compromiso aki di paga su belasting. Si e no ta cumpli cu ne, el lo confronta cu henter e sistema di cobransa y instrumento cu departamento di Impuesto y cu lo wordo aplica riba e ciudadano, y cu actualmente e ley aki no ta ofrece.

Encuanto cual ta e cifra corecto entre e hendenan cu a paga su impuesto di vehiculo di motor, ya cu dado momento a presenta un discrepancia entre e cifra presenta pa departamento di Impuesto y e cifra cu minister di Finansa tabatin.

Recientemente e cifra global cu departamento di Impuesto a presenta pa aña 2016 tabata 74mil 440 number registra di  diferente categoria. Di e cantidad ey tabatin un cantidad di 46mil 58 number cu no ta paga completamente, sea no a wordo paga pa full e aña of a paga solamente e prome kwartaal, of mita aña; den todo caso no a paga e aña completo.  Nos ta yegando caba na final di aña y tur automobilista mester tin e belasting di full e aña 2016 completamente paga.  Segun departamento di Impuesto su cifra presenta inicialmente,  un 62%  no a paga nan impuesto di vehiculo di motor, ya caba na bispo di fin di aña 2016.

Interpretacion datonan

Segun minister Bermudez e discrepancia entre e cifranan tabata ta den e conclusion of suma final. El a bisa cu e datonan no a cambia, pero e unico cos ta cu e aña aki e datonan cu a wordo genera for di e sistema digital, cu a trece e cifranan dilanti di otro forma cu añanan anterior. “Esey basicamente bo por bisa cu a causa un confusion den e conclusion cu bo mester saca for di e cifranan.”

Den su splicacion minister Bermudez a indica cu a wordo compara dos cifranan agrega cu no tabata corecto. Pues a wordo compara ariba otro e cantidad di number y e cantidad di kwartaal cu no a wordo paga ainda. Segun e mandatario bo no por compara e dos cifranan aki cu otro.

Si mester haci un comparacion –segun e mandatario- mester tuma e cantidad di plachi number cu a wordo registra y expresa nan den cantidad di kwartaal. Si e operacion aki ta wordo haci di e forma aki, e cantidad lo ta alrededor di 290 mil kwartaal cu bo ta cuminsa aña cu ne;  y cu mester wordo paga durante aña. Y si na final di aña manera e cifranan ta mustra cu ta falta mas of menos 15 mil kwartaal ainda cu ta habri of no paga, e ta duna un porcentahe producto di e diferencia entre 15 mil ariba 290 mil kwartaal cu ta alrededor di un 5% cu ainda no a cumpli cu nan obligacion segun e kwartaalnan.

“E conclusion tabata eroneo pero no e cifranan cu tabata den e base. E cifranan ta corecto.”

E mandatario a bisa cu esaki tambe ta wordo demostra si ta wordo uza otro formula. Si pa ehempel bo ta wak cu pa e aña aki pa concepto di e pago di impuesto di vehiculo di motor nan a presupuesta casi 23 miyon florin; y ya pa fin di october nan a cobra 20 miyon, pues pa e ultimo kwartaal tabata falta un suma cu mester wordo cobra y cubri di alrededor di 3 miyon. E cifra aki di 3 miyon ariba di 23 miyon florin no ta 60%, segun e mandatario.

Sistema digital
Bon Dia Aruba a puntra e mandatario: Unda e eror di interpretacion di datonan tabata sinta? E ta contesta cu tabata e forma cu e cifra a wordo produci e aña aki for di e sistema digital. Nan ta trahando keto bay riba un actualisacion riba e sistema digital cu ta e programa SAP terra na departamento di Impuesto. E manera cu e datonan a wordo produci door di e sistema digital tabata diferente cu añanan anterior. Di tal forma cu mester adapta e manera con pa haci comparacion y saca conclusion for di nan.

“E ta un eror humano y pa mi el a wordo coregi y departamento di Impuesto tambe a coregi. Pa mi e capitulo aki ta cera”, segun minister Bermudez. E cifra aki ta bay departamento di Finansa,  y ta departamento di Finansa ta distribui entre otro pa Banco Central, CAft y otro institutonan.