Mañan 31 di juli ta ultimo dia pa entrega di formulario di winstbelasting (formulario di ganashi) di aña 2023 na Departamento di Impuesto. En conexion cu esaki durante un conferencia di prensa ayera mainta director di Departamento di Impuesto, Luenne Gomez-Pieters, a elabora tocante, entre otro, e porcentahe di incumplimento di entrega di e formulario.
Gomez-Pieters a resalta cu loke ta preocupante pa nan ta cu te cu ayera 29 di juli, faltando solamente tres dia mas pa e declaracion aki wordo entrega, den nan sistema tin un cumplimento di 56% so di tur contribuyente comercial cu lo mester entrega e formulario di winstbelasting.
Esaki ta nifica cu tin un incumplimento di 44% cu ta representa 4534 contribuyente cu falta pa entrega ainda nan formulario winstbleasting.
Gomez-Pieters a remarca cu esaki ta un formulario cu contribuyentenan individual no mester entrega, pero solamente contribuyentenan comercial cu, segun el a enfatisa, nan ta spera cu ta custumbra cu e formulario caba den un forma papel, of nan tin un asesor fiscal cu por yuda nan entrega e formulario aki.
“No tin mucho cambio den e formulario, no tin ningun cambio drastico cu lo por splica e incumplimento riba e tereno aki,” el a subraya.
Gomez-Pieters a splica cu di e 44%, 4534 contribuyente, cu falta pa entrega nan formulario ainda tin 3451 contribuyente cu tin un cuenta activo den e portal di Departamento di Impuesto.
“No tin un excuus, no tin un argumento valido, segun departamento di impuesto, pa nan keda sin declara mirando cu nan ta custuma cu nos portal, nan tin un cuenta activo y nan lo por haci e declaracion di un manera mas facil y mas lihe,” el a agrega.
El a sigui splica cu e 3451 contribuyente aki tin 883 cu tin un consehero fiscal, pues no for di nan punto di bista tin otro motibo valido of argumento pa no entrega. Ademas di esaki el a indica cu 2,383 contribuyente cu no tin un consehero fiscal pero si tin un cuenta valido.
Den comparacion cu aña pasa e cumplimento ta mas abou, aña pasa tabatin un cumplimento di 60% na final di dia.
E categorianan cu ta resalta pa no a entrega nan formulario di wintsbelasting ainda ta entre otro beleginstellingen, holdings, restaurantnan, companianan den real estate y maneho di propiedad y contribuyentenan den e sector di construccion, roofing and welding.
Contribuyentenan cu no cumpli cu entregamento di e declaracion definitivo, lo haya un cobransa adicional esta un ‘naheffingsaanslag’ inclui boet. Mescos ta conta si acaso e cliente a paga un suma menos cu locual el a declara na winstbelasting. E boet pa incumplimento di entregamento di e declaracion ta maximo Afl. 2,500. Si e contribuyente no haci e pago di winstbelasting of no haci e pago corectamente, e boet ta maximo Afl. 10,000.
Pa loke ta mehoracion di nan sistema pa clientenan individual tambe por entrega nan inkomstenbelasting via e portal, Gomez-Pieters a splica cu si tur cos ta bon pa 2025, si e presupuesto pasa, lo wak si tin placa pa inversion pa nan inverti den e portal digital caminda e contribuyente individual lo por mira su estado di cuenta, lo por mira si e tin placa pa haya back of e tin un cobransa nobo den e portal y lo por cera un areglo di pago online, sin cu e tin cu yama belasting kantoor.
El a agrega cu un di e criticanan grandi cu nan tin ainda pa loke ta servicio na telefon ta cu no tin suficiente hende pa atende e cantidad di yamada cu ta drenta.
