Ayera durante un conferencia di prensa cu Departamento di Impuesto (DIMP) a ofrece pa e medionan di comunicacion local, su director Luenne Gomez Pieters, Meverly Romano di departamento di Comunicacion y Darrell Farro manager di Business Information, na caminda pa innovacion y modernisacion di DIMP, a duna di conoce e aplicacion ‘BOi, Bo Impuesto’.

Luenne Gomez Pieters a splica cu a desaroya e aplicacion specificamente pa DIMP, cu lo bay ta disponibel riba App Store fin di luna, y riba Android pa luna di juli. Pa cu esaki el a manifesta cu lo por ta un manera mas moderno di comunica cu nan clientenan, y cu na e momentonan aki lo bay ta disponibel na Papiamento y den futuro na Ingles y Hulandes.

E aplicacion ta dirigi pa e personanan por haya informacion, ricibi noticianan y por crea nan mesun profiel, por ehempel, si e persona kier controla su plachi di number ta paga, e persona por haci esey riba e aplicacion.

“Nos no por haci e pago di impuesto uno mas agradabel, pero si nos por facilita nos clientenan dunando informacion cu ta nan disposicion y tambe facilita e trayecto di pago di impuesto”, Gomez Pieters a expresa.

E compania encarga di desaroya e aplicacion ‘BOi, Bo Impuesto’ ta High Five Solutions, cu den termino di mercadeo a crea e nomber pa capta atencion di clientenan y di comunidad henter, cu un lenguahe un tiki mas comun. E tagline cu lo utilisa ta #FulSuave, cu ta nifica cu lo haci un proceso mas eficiente y facilita cu ‘tur cos ta cana suave’, manera e hobennan ta bisa.

Di mesun manera, Gomez Pieters a informa cu nan tambe tin e formularionan di impuesto online, di loke ta trata e loonbelasting y BVO cu tur luna mester entrega, y tambe lo kier agrega den futuro mas servicio, pa asina hende por cumpli cu e pago di impuesto.

Meverly Romano di departamento di Comunicacion a comenta cu esaki ta un producto cu nan ta sigur cu e lo bay yuda nan pa duna e servicio eleva cu nan ta desea pa e departamento.

Tocante e imagen corporativo di DIMP, Romano a bisa cu nan tin cu percura pa e colornan di nan organisacion ta wordo uza, asina tambe como diseño y e tipo di letter cu nan mester determina. Tambe el a informa cu nan a controla e uzo corecto di Papiamento y e contenido di e aplicacion, cosnan cu pa nan ta hopi importante.

Ademas, Romano a duna di conoce cu e imagen di ‘BOi’ ta representa pa un Super Hero, pa motibo cu kier ofrece un ‘super servicio’. Manera el a manifesta: “Nos ta desea constantemente pa eleva nos servicio, nos tin hopi pa haci ainda”. El a recorda cu nan ta duna servicio pa mas di 50.000 cliente of contribuyente y e dunamento di servicio ta keda hopi importante.

El a agrega cu den historia di DIMP nunca antes a existi un aplicacion manera esaki. Den Gobierno masha poco departamento por realisa un aplicacion, y esaki ta algo ‘cu nos como departamento di Impuesto kier curasha otro departamentonan di Gobierno, pa demostra cu nan tambe por trece innovacion pa loke ta trata servicio’, el a finalisa.

Di su parti, Darrel Farro, manager di Bussines Information cu a fungi como manager di e proyecto aki, a splica cu e aplicacion lo bay ta gratis pa App Store actualmente. Unabes e persona a descarga e aplicacion, ta ofrece: ayudo, informacion di dianan di pago, noticia pa e hende por keda update, orarionan di servicio. Ademas el a bisa cu hende por personalisa riba su mes, y haya notificacion di nan interes tocante impuesto.

Pa finalisa, Farro a comunica cu den futuro via di e aplicacion aki e personanan lo por traha afspraak, y asina e contribuyente por asisti pa un di e filialnan di e departamento.