Pa motibo di keho cu ta yega di taxista of chauffeurnan di autobus clandestino, Bon Dia Aruba a acerca Departamento di Impuesto pa puntra si ta actuando contra esaki of si tin algun control ta tumando luga.
Meverly Romano, relacionista publico di DIMP, a duna un splicacion tocante e taxi pirata y e mundo digital cu persona ta usa pa asina propaganda nan servicio. “Nos a ripara cu taxi pirata ta un fenomeno cu antes no tabata asina popular.”
Romano ta duna di conoce cu por tuma nota cu ‘mas y mas tin persona’ cu ta ofrece e servicio y publica esaki riba medionan social pa asina nan por haya cliente. Esey ta causa un gran sentido di frustracion cerca taxista legal, pa motibo nan tin un permiso legal cu ta operando manera mester ta. E frustracion ta enorme na momento cu otro persona ta lanta su negoshi den forma pirata y ta eherce un competencia. Nan tin un prijs otro cu taxista.
Segun Romano ta splica cu nan departamento di FIOT tin atencion pa cu esaki.
Nan a haya potret di persona cu ta eherce e trabou. Tambe tin potret cu ta wordo publica den medionan social. “Nos tin potret y nos tin un team cu ta trahando riba esey. Nos tambe tin e riba e website un boton mas abou den pagina, caminda por meld aan un fraude.”
Awendia tur persona cu wak algo cu no ta corecto, por meld e fraude. Romano ta duna di conoce cu esaki ta conta ademas di pa taxi pirata, pa negoshi ilegal tambe. Nan tin den plan pa introduci un tipline pa comunidad por haci usa pa asina mas hende por sa kico ta pasando.
Ta conoci cu den medionan di comunicacion por mira con taxista/ autobus ta rabia pasobra nan ta señala of sa ken tur ta haciendo e trabou di taxi pirata. Nan ta señala esaki tambe na polis y departamento di Impuesto, ya cu ‘belasting ta algo cu nos tur tin cu paga’.
Sea ta un entrada cualkier of un base pa cierto tipo di belasting, e persona tin cu paga esaki. Tin caso cu persona ta purba evita di cumpli cu ley, pero pa e motibo aki FIOT ta encarga pa haci e control.
Ora melding drenta, ta haci investigacion interno prome, pa asina saca afo ken ta e persona of personanan cu ta patras di anuncio riba rednan social. E ora FIOT ta tuma contacto conhuntamente cu Ministerio Publico pa planea un bishita, sea na cas of empresa di e persona.
Den caso di inval, por bisa si cu ta depende con e situacion of e caso ta. Romano ta splica cu FIOT ta traha estrecho cu Ministerio Publico. Nan por yama e persona cu ta bou investigacion pa asina acerca e departamento pa sigui cu proceso di interogacion.
E ta bisa cu ta splica nan pakico a ricibi un yamada pa interogacion of tambe e motibo pakico ta mirando e persona como un sospechoso. Sinembargo e persona tambe ta na su derecho pa duna splicacion di su banda kico ta pasando.
Si ta un situacion den cual e persona no kier coopera of ainda ta sigui evita paga belasting, ta considera e actonan aki como un fraude cu por yega asina leu pa para dilanti hues. Nan a yega di haya caso cu por yega te na hues.
Pa persona cu simplemente no ta cumpli cu nan deber pa paga of haci entrega di declaracion di belasting, nan ta presenta na hues. E veredicto ta bisa cu por boet e persona aki, pero ta depende ki grado di fraude ta papiando di dje.
Den ley tambe por duna e persona castigo di prison; atrobe dependiendo di e caso. “Unabes cu bay corte y hues duna veredicto, e hecho eynan ta marca abo como persona den strafkaart. E persona ta persigui manera si ta un criminal cu a comete un delito. E sentencia ta keda mescos.”
Romano ta bisa cu esaki ta importante pa motibo cu tin cosnan cu ta sucede cu ta mustra ilegal, den cual comunidad por yuda departamento di Impuesto pa hala atencion di e persona cu ta haciendo esaki. Por meld via website of e-mail na info@impuesto.aw hunto cu e tipline cu lo bin despues.
A puntra Romano tocante transporte di mucha, pasobra mayornan tin confiansa den e persona en cuestion. Ta mas dificil pa tuma nota di caso asina? E ta contesta cu e transporte di mucha ta dificil pa tuma accion contra nan, pasobra nan ta opera den privacidad, ‘pero no ta imposibel’
Semper ora haya un caso cu ta topa of drenta, ta haci un investigacion prome. Nan ta wak internamente si en berdad un acto ilegal of incorecto ta tuma luga. Pa motibo cu ta conoci tambe cu un persona cu mal intencion por yama pa acusa otro persona di haci negoshi clandestino.
E ta continua splicando cu no ta e caso cu nan ta bay di biaha tras di e persona sin haci investigacion interno, sin cu mester bishita e persona. E ta bisa cu riba medionan social nan ta wak cu hopi cosnan ta tuma luga, propaganda, riba corant nan por tuma nota di tur tipo di negoshi cu ta existiendo.
Tin caso cu accion a tuma luga. E ta bisa cu ta conoci cu persona ta operando di forma clandestino, manera compania di construccion, trahado cu no tin permiso. A haya cu mester a inval un kapsalon cu tabata opera sin cumpli cu belasting.
E ta agrega cu tambe ta bay tras di persona cu tin añanan cu no ta entrega declaracion di belasting. Cu tur tipo di acto cu ta yuda combati evasion di impuesto y ta investiga tur area cu un persona lanta un negoshi sea grandi of chikito, pa un dia of pa mas largo.
Negoshi ta keda negoshi. E departamento por mira cu awendia tin pop-up shopping ta tuma luga y nan tin bista riba esaki. “E ta manera e comerciante di kerstboom, cu solamente ta traha december. Hasta e tin cu paga belasting.”
