Directora di departamento di Impuesto (DIMP), Luenne Gomez-Pieters a informa cu nan tin un retraso grandi pa loke ta e pago di restitucion cu ta bira como un sorto di alivio pa e contribuyentenan ora cu nan ta hay’e den nan cuenta di banco.

Sinembargo nan ta trahando pa logra bin cla cu e restitucion aki. E por bisa cu loke ta e formulario di winstbelasting, departamento di Impuesto a keda cla cu 2018. Mientras cu pa e formulario di inkomstenbelasting, esey nan ta bezig cu e añanan 2016 y 2017 simultaneamente.

El a bisa cu mayoria di nan contribuyente mester por a haya caba restitucion di 2015. E departamento aki tin dos team cu ta trahando ariba 2016 y 2017 pa asina nan por caba cu e dos añanan aki. Unabes cu aña 2021 drenta, departamento di Impuesto lo continua cu aña 2018 y 2019, el a bisa.

E ta kere cu no ta cuadra mas cu e temporada actual cu un departamento tin un retraso asina grandi. Nan kier mantene e pago di restitucion up to day, unabes nan ta logra actualisa e pago aki.

Gomez-Pieters a splica cu e formulario di 2019 no mester wordo entrega mas tarda cu dia 26 di februari 2021. Pues e ta premira cu pa otro aña, e prome mita di 2021 nan enfoke lo ta ariba 2018 y 2019. Nan intencion ta cu den 6 aña di tempo e departamento por bin cla cu tur e retraso cu tin den e pago di restitucion.

Esaki a bira manera un reto personal pa Sra. Gomez-Pieters. Ya na 2015 ora cu el a cuminsa den e funcion aki, e departamento aki tabata bezig cu e restitucion di aña 2009. E ta mira cu apesar cu nan ta atrasa ainda, pero compara cu 5 aña pasa nan tin un adelanto enorme. No cu e velocidad cu nan kier, ya cu nan tin 20 hende cu ta traha cu e formularionan aki y pa yena tur e datonan den nan sistema. Si nan por conta cu mas hende e no ta duda cu nan lo bin cla mas prome. “Pero si satisfecho cu nos ta cumpliendo cu e contribuyente tambe. Ya cu esaki ta un derecho cu nan tin,” el a declara.

Un cos cu ta yuda den procesamento di formularionan ta digitalisacion, ya cu e ta mucho mas lihe. Igualmente el a bin cu e extra informacion cu e departamento aki na momento di pago di restitucion, nan ta mira cu hopi di nan ta bin bek. Esaki debi cu por ta e contribuyente a cambia di banco of tambe di account y e no a bin registra su cuenta di banco vigente cerca e departamento aki. El a haci e anotacion aki ya cu por ta e contribuyente no sa di esaki y e ta wardando su cen, pero e placa di reinstitucion no a drenta na su cuenta debi cu e no actualisa su cuenta di banco nobo.

E ta haci un apelacion pa nan contribuyente percura di update debidamente nan informacion na departamento di Impuesto, pa asina nan ta corecto y vigente. Tambe tin un formulario digital ariba nan website caminda nan por yena tur informacion necesario y nan ta procesa esaki den nan sistema.