Departamento di Husticia y sistema di corte federal di Merca a revela diaranson cu nan tabata entre decenas di agencianan di gobierno Mericano y companianan priva afecta pa un campaña masivo di spionahe cibernetico cu oficialnan Mericano a vincula na hackernan Ruso.
E departamento a bisa cu 3% di su cuentanan di e-mail Microsoft Office 365 potencialmente a ser afecta, pero no a bisa na ken e cuentanan en cuestion tabata pertenece. No tin indicacion cu sistemanan clasifica tabata afecta, e agencia a bisa. Office 365 no ta djis email, sino un ambiente di computacion colaborativo, cu ta nifica cu sigur a haya acceso tambe na documentonan comparti, segun Dmitri Alperovitch, ex-CTO di e compania di seguridad cibernetico CrowdStrike.
Apart, e Oficina Adminsitrativo di Corte Mericano a informa cuerponan di husticia federal na e pais cu e sistema di maneho di caso nacional di e corte a ser viola, potencialmente dunando e hackernan acceso na documentonan di corte seya.
Departamento di Seguridad Nacional tabata investigando e sistema, a bisa, y a cita un riesgo particular na documentonan seya di corte, cu su revelacion por pone investigacionnan criminal activo den riesgo.
Diamars ultimo, agencianan di cumplimento di ley federal y di inteligencia formalmente a implica Rusia den e intrusion, yamando nan parti di un operacion pa compila inteligencia. Presidente Donald Trump anteriormente a cuestiona e consenso aki, sugeriendo cu China por ta responsabel.
E campaña di hacking tabata extraordinario den su escala, cu e intrusonan pasando door di agencianan di gobierno incluyendo departamentonan di Tesoro y Comercio, contratista di defensa y companianan di telecomunicacion durante varios luna prome cu a descubri e hacking.
Expertonan ta bisa cu esey a duna agentenan stranhero suficiente tempo pa colecta data cu por ta extremadamente dañino pa seguridad nacional Mericano, maske e grado di e violacion y ki informacion exactamente tabata busca, ta desconoci.
