E Departamento di Husticia di Merca ta puntra Corte Supremo di Merca, e tribunal mas halto di e pais, si presidente Donald Trump mag di blokea siguidonan riba Twitter.
Presidente Trump a perde un caso contra un grupo di usuarionan di Twitter cu el a blokea na mei 2018. Un hues federal dicta cu blokea siguidonan di Twitter por parti un funcionario den e cargo ta bay contra di constitucion. Esey ta door cu usuarionan di Twitter riba e plataforma social no mag di responde mas riba tweets di Trump, pasobra el a blokea nan. Por tanto, e accion ta viola e derecho di libertad di expresion.
E presidente di Merca ya a purba di anula e sentencia via un tribunal di apelacion, pero na juli 2019 esey a coincidi cu e sentencia di hues di New York. Segun e tribunal, la libertad di expresion ta “efectivamente, aunke modestamente” restringi. “Nada mas ta necesario pa viola e constitucion.”
E Departamento di Husticia di Merca señala cu e huicio aki a aborda “e capacidad di figuranan publico, desde e presidente di Merca te un concejal di un ciudad, pa protege su cuentanan di rednan social di intimidacion, trolling y discurso di odio”.
Presidente Trump ta usa su cuenta personal, @realdonaldtrump pa anuncia, defende of responde riba problemanan politico. Cas Blanco tambe ta otorga e presidente e cuenta oficial @POTUS, pero presidente Trump ta usa e cuenta ey menos.
