![North Korea Identity Theft](https://www.bondia.com/wp-content/uploads/2024/05/DEPARTMENT-OF-JUSTICE-696x464.jpg)
(AP) – E departamento di Husticia Mericano a anuncia diahuebs varios aresto den un serie di caso di robo di identidad compleho cu oficialnan a bisa ta parti di un skema amplio cu ta genera ganashi enorme pa e gobierno Nort Koreano, incluyendo pa su programa di arma.
E conspiracion ta trata miles di empleado IT di Nort Korea cu ta despacha pa e gobierno pa biba den exterior y cu ta depende riba identidadnan horta di Americas pa obtene empleo remoto na companianan Fortune 500 basa na Merca, trabaonan cu ta duna nan acceso na data corporativo sensitivo y pagonan lucrativo. E companianan no ta realisa cu e empleadonan ta den exterior.
E skema di fraude ta un manera pa Nort Korea, cual ta sumamente sanciona y aparta di e sistema financiero Mericano, por tuma bentaha di e “mescla toico” di factornan cu ta inclui un escasez di labor di tecnologia halto na Merca y e plamamento di trabao remoto, Marshall Miller, Departamento di Husticia su abogado diputado principal a bisa den un entrevista.
Segun e departamento, e casonan aki ta parti di un strategia pa no solamente persigui e individuonan cu a permiti e fraude sino tambe pa crea partnership cu otro paisnan y adverti e companianan den sector priva tocante e necesidadnan pa permanece vigilante tocante e identidadnan real di e personanan cu nan ta contrata.