Minister Alex Schwengle a destaca e trabou y balor pa salud publico di e departamento di Higiena cu a celebra su 80 aña di existencia. Specialmente e control di higiena cu nan ta bin realisando den establecimentonan comercial cu tin di haber cu cuminda y bebida.
El a laga sa cu sinceridad cu esaki ta un departamento cu como mandatario e ta bin conoce durante e ultimo añanan.“Eigenlijk ta un berguensa cu mi no tabata sa cu ta existi un departamento asina largo, y haciendo un trabou asina importante.”
El a bisa cu ora el a asumi su funcion como minister di SaludPublico, e prome hende cu a bati su porta tabata directora actual di e departamento di Higiena, Yvette Geerman. Den e prome contacto aki, sra. Geerman a papia cu e mandatario tocante su plannan y e necesidadnan cu e departamento aki tin pa ehecuta nan. “Ta duel mi cu mi no por cumpli cu tur e deseonan ainda. Nan tin su motibo.”
E mandatario a declara cu e departamento aki ta realisa un trabou importante pa salud publico y pa henter comunidad. E mandatario tabata consciente y auto critico pa bisa cu falta cierto aspectonan pa atencion. Pero apesar di esey nan tin su atencion ainda.
Tambe e mandatario a laga sa cu e ta sostene departamento di Higiena su trabou pa ta activo realisando trabou pisa di control.
“For di e dia ey departamento di Higiena a haya e titulo cu ta cera hopi restaurant.” E ta haya cu ta bon pa e departamento aki por ehecuta e tipo di control aki pasobra como departamento di Higiena nan mester tin un imagen afo cu nan ta basta activo y pro activo tambe. Segun e minister ta importante pa departamento di Higiena “purba di planta un respet pero no di un manera negativo.”
Importancia
Minister Schwengle a destaca cu e tarea di e departamento aki ta uno hopi amplio; y e no tin di haber exclusivamente cu control di higiena den establecimento comercial di cuminda y bebida.
E importancia di e departamento di Higiena ta uno clave pa eleva e promedio di bida di nos hendenan. Minister Schwengle a bay den historia caminda antes e promedio di bida di ser humano tabata alrededor di 30 aña. Specialmente hende homber tabata muri basta jong.
Despues a bin un cambio cu a eleva e promedio di bida pa mas cu 60 aña. El a bisa cu e cambio cu a haci esaki posibel no tabata antibiotica, sino cu e cambio grandi cu a bin dor di control di higiena. “E hendenan a bin realisa cu e cosnan cu ta matando nos ta e sushi. Man sushi, riolering habri, etc..”
