Diabierna anochi departamento di Higiena a celebra su 80 aniversario di existencia.
E celebracion aki a tuma luga den nan sede for di 1982 situa na Dr. Oduberstraat 1.
Despues di 80 aña di existencia, e ta kere cu nan ta confronta hopi reto den futuro, specialmente mirando tur e cambionan den tecnologia cu tin rond di mundo. “Nos mester para keto y pone atencion ariba e tereno di higiena y nos mester hisa e calidad,” asina e director Yvette Geerman a bisa.
El a trece dilanti cu invertiendo tanto den personal y instrumento den e departamento aki nan lo por logra hopi pa yega na e nivel internacional cu ta wordo exigi di parti di nan departamento.
“Aruba ta un isla chikito pero esey no ta descarta cu nos mester pone atencion ariba e vulnerabilidad cu nos tin.” Un punto cu el a bisa cu mester pone atencion ta esun di e comemento safe cu a bira un reto hopi grandi pa nan atende cu ne tanto pa nos hendenan local como pa nos bishitantenan.
Reconocimento
P’esey durante e acto aki a wordo rindi reconocimento na e yiunan di tera cu a yega di fungi como director di e departamento aki, y cu a hunga un rol importante bou e departamento aki: Fabian Kelly, John de Cuba (d.f.m.), Humpfry Henriquez(d.f.m); Jozef Frido Maduro; Albert “Tico” Bremer y Ludmyla Yvette Geerman.
Sra. Geerman a probecha e ocasion special aki di nan hubileo pa resalta e importancia di e departamento aki den comunidad. E rol cu nan ta hunga ariba diferente tereno cu no tin di haber exclusivamente cu control di higiena den establecimento comercial manera restaurant. E ta un parti so den nan tarea den e tereno turistico internacionalmente. El a bisa cu nan tarea ta hopi amplio ya cu nan ta haci control entre otro riba calidad di awa, control riba santana y e diferente graf.
“Mi ta kere cu como departamento nos tin un rol hopi vital riba infrastructura y e parti economico di Aruba.”
Sra. Geerman a gradici tur esnan cu a forma parti di e departamento di Higiena y cu a carga e departamento pa 80 aña largo. Tambe tur esunnan cu a duna nan sosten directo of indirecto y el a laga sa cu nan ta spera sigui conta cu e sosten di nan tur.
Den e acto di celebracion aki a wordo devela e borchi nobo di e departamento aki na entrada di nan sede. Sra. Geerman cu palabra di emocion a señala cu nan ta kere cu “ta bon pa bo conoce bo pasado pa bo traha riba un bon futuro.”
Breve historia
Prome cu aña 1936 no tabata existi un departamento di Higiena ni un maneho structura ariba higiena na Aruba. Na aña 1921 na Corsou a pasa un ley riba maneho di higiena cu tabata wordo considera como suficiente atende problematica di higiena den un pais. Pero danki na establecimento di Lago na 1924 a trece e presencia di hopi trahadonan di afo cu a trece un presion no solamente di poblacion sino riba un maneho structural di e forma di maneho di higiena den nos poblacion.
Ya cu e tempo ey e viviendanan tabata traha di palo y zink caminda e condicion di higiena no tabata optimal ya cu no tabatin un maneho coherente riba desperdicio den general incluso sushi di ser humano tabata wordo benta den mondi.
Na 1925 cu e yegada y establecimento di dokternan riba nos isla e aspecto di salubridad publico y higiena a haya mas atencion. Y na aña 1935 a bin cu regulacion nobo caminda a wordo exigi cu tur cas mester tin sanitario. Na 1936 a nace e departamento di Higiena na Aruba y e prome director tabata meneer Riddermack naci na Hulanda kende a fungi mas tanto como controlado durante 20 aña. For di aña 1960 te cu awor departamento di Higiena a wordo maneha pa nos propio yiunan di tera.
