Durante e dianan di Pasco, Departamento di Emergencia na Hospital a atende 300 pashent. E averahe di tempo di spera tabata 37 minuut. Esaki segun e relato ricibi.
Departamento di Emergencia tabata bastante ocupa, pero tabata prepara pa esaki.
Desde dia 24 di december pa 6or di mainta te cu 27 di december pa 6or di mainta, Departamento di Emergencia a atende e 300 pashentnan di cual 47 pashent a ser admiti den nos Hospital. Tabatin 182 pashent, esta 60% di e 300 pashent cu kehonan un dokter di cas por a atende cu nan.
E edad di pashent cu a acudi na Departamento di Emergencia a varia entre baby pa 108 aña. E tres motibonan mas grandi pa acudi na nos departamento di Emergencia tabata kehonan di griep, di stoma y kehonan cardial, esta di curason.
E Departamento ta conseha pueblo pa sintomanan comun durante dianan di fiesta acudi cerca bo dokter di cas. Si e dokter di cas no ta disponibel por pasa na dokter di warda of Huisartsenpost.
Huisartsenpost lo ta habri dia 30 y 31 di december 2017 y 1 di januari, mescos cu e orario durante weekend cual ta di 9or di mainta te 1or di merdia y 6or di atardi te 10or di anochi. Hospital tambe ta informa cu ta brinda un orario di bishita mas flexibel durante fin di aña. Durante e cambio di aña por bishita bo ser keri di 11pm pa 1am y riba dia 1 di januari 2018 lo tin un orario di bishita extenso entre 11.30 di mainta te cu 8or di anochi. Esaki ta cu excepcion di e departamento di ICU/ CCU, PAAZ, departamento di Maternidad y departamento di Mucha.
Otro dianan por bishita bo ser keri durante e orario nobo di bishita cual ta di 11.30am pa 1pm y di 3pm pa 8pm. Esaki tambe cu excepcion di e departamento di ICU/CCU, PAAZ, departamento di Maternidad y departamento di Mucha y Stroke Unit.
Durante e ultimo dianan di 2017 celebrando fin di aña departamento di Emergencia ta pidi un y tur pa bay poco poco riba caminda pa asina evita peliger, evita consumo di alcohol excesivo y no stuur si bo a consumi alcohol. Tambe sea hopi cauteloso cu vuurwerk, protehando bo mes y otro.
