Minister Glenbert Croes a reuni cu Seargant-major Elvis Manuela, Sra. Myrna van der Kaap y Sr. Stanley Nooitmeer di Ministerio di Defensa Hulandes. E ministerio Hulandes a expresa interes pa traha hunto cu Aruba pa recluta hoben cu tin interes den un carera den Defensa di Reino.
Segun un comunicado di prensa, a pesar cu minister di Asunto Social, Glenbert Croes su mision na Hulanda ta pa presenta su reportahe riba e crisis plan social, den su opinion oportunidadnan laboral ta bay man den man cu desaroyo social.
E titular di Asunto Social y Labor a expresa su apoyo total na Ministerio di Defensa di Hulanda, cu kier traha cu Aruba riba reclutacion di hobennan entre 16 aña y 27 aña di edad cu tin interes di sigui un carera den Defensa di Reino, ya sea den Marina, Forsa Aereo, Ehercito of Marechaussee.
Esaki ta un gran oportunidad por ehempel pa esunnan cu no a logra termina un scol of un estudio, pero cu sigur kier inverti den nan futuro. Tambe pa esun cu kier un trabou cu ta ofrece tremendo prospecto y condicionnan laboral. Hasta cu si bo ta gradua profesionalmente pero ainda tin interes pa sigui desaroya bo mes. Pa tur hende cu tin interes, Defensa di Reino ta ofrece un tremendo oportunidad pa inverti den futuro y sigui desaroya bo mes, segun e comunicado.
Fin di october, Ministerio di Asunto Social y Labor lo presenta su ‘jobfair’ pa tur hoben cu kier un carera den Defensa, cu lo kier un di dos oportunidad den bida of cu simplemente kier sigui desaroya su mes profesionalmente.
“Nos ta bay traha di cerca cu Ministerio di Defensa di Hulanda den e proyecto piloto: ‘Werven in het West’, pa duna nos hobennan di Aruba e oportunidad na Hulanda cu posibel careranan den Defensa di Reino”, Croes a expresa.
