E aña aki ta celebra 30 aña di Aruba su Status Aparte, pero tambe 40 aña di Aruba su Himno y Bandera. For di aña 1986 Aruba tin un bandera oficial di cual ta hancra den ley. Director di Departamento di Cultura (DCA), Sr. Siegfried Dumfries a indica cu esaki a pasa den e ley na aña 1991. Esunnan cu kier importa y bende bandera di Aruba, mester acerca Departamento di Cultura pa motibo cu segun ley nan ta e instancia huridico pa tene control pero tambe nan por duna sancion na esunnan cu no ta cumpli cu e rekisitonan di e color di bandera.
Den transcurso di tempo diferente color di bandera a wordo mira aki na Aruba. Pero gobierno a purba di regula esaki por medio di un ley. E ley aki pa regula y bin cu un uniformidad den color di bandera a pasa den luna di october 2014, segun Sr. Dumfries. Prome cu esaki tabata tin tres diferente comision cu a traha riba e asunto aki. Tres comision cu a conseha diferente minister di cultura, pero tambe gobierno di signatura prome cu esaki. Tur a bin cu e mesun conseho cu ta oficialisa e color di bandera aki.
E color di bandera di un pais tabata wordo fiha pa un nacion uni, cu actualmente e ta bay International Flag Institute na London. E ultimo comision tabata consisti di Sra. van Roomland, Sr. Roy Brete di BID, Sr. Nelson Croes di BID y Sr. Frank Croes kende ta ex director di Instituto di Cultura. Nan a bin cu e conseho, conforme cu e conseho di International Flag Institute pa oficialisa e color di bandera di Aruba cu e codigonan di blauw PMS 279c, color geel PMS 109c pantone yellow, color cora PMS 032c union jack rod. “E meta naturalmente ta pa salvaguardia e color di bandera di Aruba. Y pa pais Aruba por tin un solo color di bandera pa asina tambe tin un nificacion pa cu esey,” segun e director.
Comision interdisciplinario
“Esey tambe ta e tarea di gobierno pa salvaguardia esaki Y pa asina nos tin un solo color di bandera y pa por tene control riba esaki pa bienestar di nos tur aki na Aruba,” el a indica. Naturalmente gobierno tin e tarea di eherce esaki. Pa cu esaki a bin cu un comision di diferente instancia interdisciplinario cu lo conseha gobierno riba e tereno aki y pa eherce e control. E comision aki ta existi di e Departamento di Cultura, Ministerio di Cultura, Duana cu hopi biaha ta esunnan cu ta ricibi e carganan, KPA cu tin e funcion di tene control riba tur loke ta sosode riba Aruba, y BID cu ta e instancia cu semper a bende bandera pa gobierno di pais Aruba.
Campaña di conscientisacion
Aworaki Departamento di Cultura conhuntamente cu Ministerio di Cultura ta bay enfoca riba conscientisacion. Conscientisacion di e color di bandera cu tin un codigo uniforma, di cual tur hende mester tene nan mes na esaki y pa asina por salvaguardia e uzo di e color corecto di e bandera di Aruba. E campaña di conscientisacion a cuminsa na 2014, di cual a sigui den 2015 pero tambe pa cu e aña aki. Tin un maneho stipula pa cu esaki. Naturalmente lo sigui conscientisa, Sr. Dumfries a enfatisa. Esunnan cu kier, e bendedonan di bandera cu ta importa, tin un manera fiha pa cu esaki, depende di e cantidad di bandera cu ta wordo importa.
Instancia pa tene controla
Na momento cu no acerca Departamento di Cultura lo por bin un sancion. Pa ley e Departamento di Cultura ta e instancia cu podera pa tene e control. Esaki ta nifica cu esunnan cu ta cumpra y bende bandera, mester acerca DCA pa asina haya un permiso pa por importa y bende bandera, segun e director. E permiso aki tin tur informacion necesario di e persona cu lo bay importa y bende e banderanan. Si ta un instancia mester di e number di camara di comercio, pero tambe tur informacion di e instancia concerni.
Na momento cu e bendedo yega na Departamento di Cultura, mester tin un muestra di e color di bandera. E bendedo lo sinta cu un personal DCA pa asina splica riba tur e exigencianan pa importa e banderanan, el a indica. Importante ta pa por unifica pa por salvaguardia e color di bandera manera cu e ta fiha den ley. Esaki ta un ley cu a pasa y tur hende mester respeta esaki.
.jpg "Philipine van Aanholt 26 luga prome dia Laser Radial Weganan Olimpico")
