Departamento di Cultura a colabora hunto cu Exprodesk, mirando cu ta trata di creatividad, unda nan kier motiva artista sea den musica, escritor, artesano y tur den e mesun categoria di arte.
Stan Dabian, relacionista publico di departamento di Cultura, ta bisa cu ta importante pa artista atende e tayer si tin talento cu nan kier sigui crece den dje, sea con pa lanta un website unda nan por exporta nan creatividad den cualkier area, y tambe locual ta trata derecho di autor y con pa proteha nan trabou.
Pa e motibo aki, Departamento di Cultura ta involucra y motiva. Nan por ripara cu mas artista ta presente, na banda di persona comercial. “E ta un mix di hende cu tin negoshi y plataforma, pero nos kier crea mas artista pa nan por mustra nan producto local. Anto esaki ta e instrumento pa nan yega na nan propio negoshi y con pa atende cu belasting.”
Un participante di e tayer, Monica Oduber, tambe a expresa cu actualmente mundo ta den comercio online. Pa Aruba, e no ta mucho conoci. El a agrega cu e tayer ta importante pa wordo informa den e posibilidad cu tin den e crecemento pa empresario y artista local, pa nan no keda na Aruba, pero enfoca riba un produccion mas grandi pa ‘full mundo’. El a remarca cu ta bon pa gobierno sigui ofrece un plataforma unda cu e persona por continua cu nan servicio.
Oduber mes tin experencia, e tin su negoshi y material cu el a patenta hopi aña atras. Awo el a haya oportunidad pa ofrece mundialmente. “Un mensahe pa tur mundo y pa Aruba, pa tur tin un solucion pa yega leu.”
