Cuminsando dia 1 di october proximo, Bureau City Inspector lo drenta un era nobo, completamente digitalisa.
E meta di digitalisacion cerca BCI ta pa facilita nan trabou, di manera cu lo por soluciona problemanan di un forma mas eficiente, y comunidad di Aruba por ricibi ayudo mas lihe, segun un comunicado di prensa.
E sistema nobo cu lo implementa october proximo yama DECOS, y siman pasa e trahadonan a ricibi un splicacion di e sistema aki for di bureau di minister Otmar Oduber.
E digitalisacion lo tin como consecuencia cu casi tur hard copy lo keda elimina, di e forma aki tambe contribuyendo na eficiencia. Segun e comunicado, e departamento a keda satisfecho cu e cambio cu lo bay implementa.
