Fin di luna di december ta caracteristico pa uzo di klapchi, cendemento di candela y accidentenan di auto pa departamento di Bombero di Aruba. Ferdinand Ponson a informa pa Bon Dia Aruba cu na aña 2019 nan a haya menos candela di mondi , el a duna di conoce cu nan tabatin 743 melding.
Na december, dia 23 specificamente, Ponson a splica cu nan a haya 4 accidente, uno na Savaneta, 2 riba Avenida Nelson Orlando Oduber y otro na Santa Cruz, den cual auto a bolter y e hendenan a keda pega den dje, el a comenta cu e incidentenan a sosode den menos di 24ora.
Desde dia 27 cu a cuminsa cu e temporada di vuurwerk te dia 31 di december nan tabatin 31 melding di candela den cual nan mester haci asistencia y traha pa paga, asina como tambe a manifesta cu tabatin 3 persona adulto di 21 aña bay ariba herida, ningun mucha a keda afecta pa klapchi e aña aki. El a comenta cu dos di e personanan tabatin daño na nan wowo, cara y un na su man. Tambe, el a señala cu dia 1 di januari den oranan di mainta, nan a haya e melding cu un auto pega na candela coriendo, cual ningun persona a ser afecta.
Tocante preparacion pa Carnaval 66, Ponson a splica cu Cuerpo di Bombero no ta participa den esaki, loke nan ta haci ta staciona un truck memey di caminda cu ta cera pa motibo di proteccion pa si algo lo pasa.
Di mesun manera, el a bisa cu nan mester tene un reunion cu SMAC pa loke ta trata e camindanan cu mester keda habri y accesibel, pa motibo cu den dianan di parada ta existi hende cu ta para malo den camindanan cu ta dificulta e yegada di e trucknan na e momento di un incidente y pueblo mester compronde cu tin ruta manera Seaport cu ta ruta di emergencia.
