Aviacion, sin duda, ta di vital importancia pa e economia di nos isla. Ta p’esey Departamento di Aviacion Civil di Aruba, conhuntamente cu partnernan den Reino, ta co-organisando un dialogo den forma di un webinar riba dia 22 di october 2020, den cual un grupo di studiante di educacion na vans aden Reino Hulandes por dialoga conhuntamente riba e pregunta “Con nos por organisa y mehora, na un manera innovativo, e futuro di nos aviacion na un forma sigur, eficiente y duradero pa nos medio ambiente?”

E dialogo lo consisti di un webinard en cual algun experto y stake holder importante(manera NACO, NLR) lo duna nan vision tocante aviacion duradero den nos region. Lo ta bay tin espacio pa preguntanan y feedback. Na final lo ta bay tin un “Challenge” pa studiantenan pa bin cu solucionnan creativo pa bulamento sostenibel. Nan por entrega un resumen di un business plan pa cu esaki, y lo ta bay tin un premio di placa pa e ganado di e Challenge aki.

Meta di esaki ta pa laga e generacion nobo cuminsa pensa riba e futuro di aviacion pero tambe pa uni forsa y mehora cooperacion den Reino Hulandes pa loke ta aviacion.

E dialogo lo tuma luga via internet na Hulanda, Aruba, Corsou y Boneiro simultaneamente. Na Aruba e dialogo lo tuma luga den e sala di conferencia di Departamento di Aviacion Civil na unda lo ta bay tin un cantidad limita (pa mantene distanciamento social) di studiantenan di Universidad di Aruba (Facultad SISSTEM) y Colegio EPI (Unit Ciencia&Technologia),cu lo haya e oportunidad di participa activamente den e dialogo hunto cu un moderador. Studiantenan di Universidad di Aruba (Facultad SISSTEM) y Colegio EPI (Unit Ciencia&Technologia) cu ta interesa pa participa activamente por tuma contacto cu nan scol pa registra y pa haya mas informacion.

Vuelonan cu energia electrico

Recientemente Ministerio di Infrastructura di Hulanda a laga haci un estudio tocante bulamento cu energia electrico of hybrido. E estudio aki a mustra cu e islanan ABC tin e condicionnan ideal pa haci pruebanan cu bulamento cu energia alternativo. E islanan tin un bon localidad geografico y nan ta situa cerca di otro. Ademas tin hopi fuentenan di energia alternativo presente.

Masterplan

A base di diferente estudionan efectua,Ministerio di Infrastructura di Hulanda a bay di acuerdo pa cuminsa crea un Materplan titula: “Innovatie project Elektrischevliegen in de Cariben”. Pa por completa e Masterplan aki tin hopi trabou cu mester wordo desplega y hopi informacion cu mester adkiri, manera disponibilidad di avionnan, infrastructura, y gastonan envolvi. Na e momento cu e Masterplan kedacla, e lo inclui un trayecto pa realisa vuelonan entre e islanan ABC uzando energia alternativo, for di e momento di certificacion te na e momento di implementacion.

E resultadonan di e dialogo di dia 22 october 2020 lo wordo uza como input pa cu e Masterplan. E intencion ta pa mita di aña 2021 e Masterplan keda completa.

E pandemia di COVID-19 ta mustra e importancia di uni forsa y traha en conhunto. E temponan cu nos ta aden tin hopi desafio pa e industria di aviacion y ta rekeri di solucionnan creativo. Cooperacion, comparticion y ampliacion di conocemento ta crucial.

E dialogo“Together we can fly for ABC” ta wordo realisa cu cooperacion di Ministerio di Infrastructura di Hulanda, conhuntamente cu partnernan den region, entre otro Directie Luchtvaart Aruba, Curacao Civil Aviation Authority, Dutch Caribbean Air Navigation, Kamer van Koophandel Bonaire y Link ERS Project managementen Advies.