ORANJESTAD – Durante e conferencia di prensa di gobierno, minister encarga cu economia a splica cu prijs di pan y webo ta wordo controla door di Departamento di Asuntonan Economico.
No ta den Canasta Basico:
E mandatario ta sigui splica cu debi cu tin produccion di pan y webo na Aruba, e prijs maximo pa e productonan aki ta wordo calcula na un manera diferente cu e productonan den Canasta Basico. P’esey pan y webo no ta figura den e lista di Canasta Basico, pero si ta someti na control di prijs pa Departamento di Asuntonan Economico.
Pan:
Unicamente pan blanco ta wordo regula pa gobierno. E intencion ta pa inclui pan bruin tambe. Departamento di Asuntonan Economico ta den negociacion cu e panaderonan pa stipula e prijs maximo di pan. Mester remarca cu aña 2011, panaderonan a adapta e pan blanco, haci e pan plus, y asina evita cu su prijs por a wordo regula.
Webo:
Minister Xiomara Ruiz-Maduro ta splica cu e control riba prijs di webo ta dificil, ya cu tur siman, diferente mayorista ta importa diferente marca di webo. Esaki ta haci dificil pa regula e prijs, ya cu e prijs ta cambia tur siman. E control di prijs ta dificil tambe ya cu diferente mayorista ta trece mesun marca na diferente prijs. E funcionarionan na Departamento di Asuntonan Economico ta trahando duro riba un plataforma pa regula y controla e prijs di webo mas miho.
