No solamente importacion ilegal di gasolin di Venezuela tin atencion di Ministernan Arends y Bermudez, pero tambe benta di productonan di Venezuela y Colombia cu ta drenta via barconan, y cu no ta cumpli cu exigencianan di negoshi.
“Tur esnan cu ta haci e negoshi aki na Aruba mester tin un permiso di establecimento,” Minister Arends a bisa. Durante e reunion entre e dos ministernan en cuestion, Departamento di Asuntonan Economico, DTI, ASTEC, APA, Douane y Douane Recherche, a discuti y tuma decision pa pone un stop na e situacion aki.
Minister Arends: “E productonan ta wordo rebendi na supermercadonan di un manera ilegal. Esnan cu ta bende e productonan aki no tin un ‘vestigingsvergunning’, nan no ta contribui na impuesto y p’esey mes cu Departamento di Asuntonan Economico ta bay ta fisicamente presente na waf pa ora e transaccionnan aki tuma luga pa pidi esnan envolvi e documentonan necesario pa por importa y bende productonan aki na Aruba.”
Arends a bisa cu hopi biaha e benta ta sosode na moda di bisa den parkeerplaats mes. Pa por haci e negoshi aki mescos cu pa tur otro negoshi mester tin permiso. “Ta p’esey mes tambe cu Departamento di Asuntonan Economico ta bay tin un rol hopi mas visibel den henter e proceso fisico di importacion di productonan riba nos isla.” Desde awor padilanti ta bay frena e negoshi aki tambe. Asina ta cu tur hende ta avisa cu control rigido ta bay start riba e forma di haci negoshi aki.
