Departamento di Asunto Social tocante dia di Trabou Social: “E problema ta hopi grandi y e trabaonan ta sigui”

Dia 15 di maart ta wordo celebra como e Dia Internacional di Trabou Social, unda cu ta duna reconocemento na tur profesional cu dia pa dia ta traha pa yuda sociedad cu conseho, cu prevencion y cu orientacion pa tur esnan cu ta biba momentonan dificil.

Departamento di Asunto Social (DAS) ayera mainta a ofrece un conferencia di prensa pa asina duna informacion tocante e dia aki. Glenda Hernandez, director di e departamento, a splica cu trabao social na tur sociedad na mundo ta un trabao hopi indispensabel cu mester wordo haci.

El a trece dilanti cu den pasado Aruba no a duna suficiente atencion na esaki como bienestar social, mental y fisico, cu ta aspectonan hopi esencial den bida di un famia y den e bida di un persona, unda no a inverti tanto cu fondonan como den personanan profesional pa asina nan por guia famianan.

Na e momentonan aki, cada trahado social ta guia 10 famia y nan por yega te 40 caso, loke ta nifica cu tin un averahe di 1.000 caso cu ta wordo atendi pa aña cu guia intensivo. Esaki ta costa capacidad y mester di placa, pa motibo cu sin fondonan e trabao ey no por sucede. Aparte di esey tambe tin hende cu ta traha di manera boluntario, cu den tereno social esey ta hopi importante, manera Hernandez a sigura.

“Esaki no ta un trabao facil, pasobra aworaki e problema ta hopi grandi y e trabaonan ta sigui. Nos ta bishitando cas di famia y yuda nan den diferente proyecto”, el a bisa.

Tocante e bishitanan cu el a menciona el a trece dilanti cu nan tin dos manera di haci esey. Den ultimo añanan DAS a bay scolnan y wak kico ta e problemanan social na scolnan y haci bishita na cas a base di escogencia di famianan cu kier pa DAS yuda nan pa haya guia.

Den esaki, Hernandez a comenta cu nan a yuda 59 famia casi un aña largo, unda e resultado completo a sali afo.

Un otro maneho cu el a anuncia cu nan kier hiba na DAS ta cu nan ta bay wak e hende riba bijstand e aña aki y nan ta bay bishita nan pa wak kico por haci pa por yuda guia e famia pa bin dilanti. Ademas nan tin nan diferente servicionan na diferente localidad, unda hende por drenta y pidi ayudo na momento cu nan tin mester.

“Tin diferente forma pa por yuda riba e tereno aki” Hernandez a sigura.

Di igual manera el a declara cu nan ta duna guia y ayudo, pero e famia tambe mester pone di su parti. “Nos no por tuma e escogencia cu un persona ta haci den su bida, esey ta e mama y e tata, e mayornan tin cu haci e escogencia y e decision pa bin dilanti cu nan famia, esey nos no por haci’e pa nan. Nos ta brinda sosten, conocemento, nos ta yuda nan den cosnan cu mester bin dilanti, esey ta nos rol y nos ta haci nan consciente di nan mes como famia, cu nan por prospera riba diferente tereno”, Hernandez a señala.

Tambe el a menciona cu ora nan ta yuda, nan ta bay te na e origen di kico ta e problema. Esey kiermen cu nan ta wak por ehemplo pa ki motibo un hende tin un maneho financiero cu no ta cuadra, pa asina wak kico por haci pa e persona aki por bay maneha su placa miho. Esaki ta exigi experticio di trahado social, pero tambe mester di experticio di abogado liber, di psicologonan pa yuda riba nan tereno e problema cu tin den area social.

Di su parti, Miriam Illidge cu ta fungi como trahado social di DAS a trece dilanti cu mundo di yudansa social a inicia hopi aña pasa, unda cu hendenan di bario tabata haci trabaonan caritativo. Y den transcurso di añanan e casonan a bisa mas complica, cu a haci cu studionan y profesionnan a wordo crea, cu awendia nan ta yama trahadonan social, psicologo, ortopedagogo, entre otro.

El a comenta cu anan cu ta den area social no por haci nan trabao riba nan mes, nan mester di cooperacion entre instancianan, na unda cu nan como DAS hamas lo por yuda un cliente riba nan mes, segun Illidge a bisa.

“E persona mas cardinal den esaki ta e cliente mes. Si e cliente no ta determina pa sigui e guia nos ta keda para den mesun caminda. E decision y responsabilidad final ta keda den man di nos clientenan, esey ta un di nos retonan. Otro reto ta cu mester educa pueblo, nos no por mantene nos pueblo bobo. Ora bo ta educa comunidad e pais ta bay dilanti, educacion no solamente ta na scol, nos grandinan tambe, pa hende sa kico ta bo responsabilidad como persona”, el a expresa.

Pandemia di Covid-19 a trece consecuencianan, unda cu famianan a keda den un instabilidad enorme. El a sigura cu ainda nan tin mama y tatanan di famia cu no tin trabao y cu esey ta un situacion hopi fastioso cu nan tin cu deal cune. “Ainda nos tin e problemanan social emocional y nos tin hopi hobennan cu tin problema.”

Comunidad henter tin retonan grandi riba e area social y pa e motibo ey nan ta kere cu nan mester ta presente mas den comunidad, pa hendenan sa cu nan no ta nan so, el a finalisa.

Jesseline Kelly, PR di e departamento aki, a informa cu DAS a dicidi di haci un actividad den e departamento unda cu tur esnan cu ta traha den dje lo participa den un campaña interno di e departamento, cu e lema mundial di e aña aki, “Construi hunto un mundo eco-social nobo lagando ni un hende atras.” Nan ta bay para keto un rato riba rednan social pa brinda un seguridad cerca cada persona di e comunidad y pa crea un mundo mas sostenibel.

E campaña ta bay ta uno unda e trahadonan lo manda diferente tips con nan por crea un DAS mas sostenibel, na final di luna di maart nan lo saca un ganado y nan lo ehecuta su plan.