Departamento di Asunto Social: Proyecto di prevencion y yudansa trempan

Departamento di Asunto Social a comparti con nan ta premira 2020 pa locual ta trata e Social Crisis Plan. Nan a splica tocante e tereno di prevencion y pa por tin yudansa for di trempan.

Director Glenda Hernandez a duna di conoce tin 31 proyecto cu ta wordo ehecuta. Esey ta e prome stap cu cual a cuminsa Social Crisis Plan, pa pone e base na ordo, mirando cu esey no tabata na ordo.

Sinembargo nan ta bay bin cu un ‘one stop shop’ riba e caminda di prevencion y pa tin ayudo for di trempan. Nan tin un centro cu ta den plan pa lunanan binidero, cu lo ta un centro pa hoben y famia.

DAS lo bay trata den prevencion caminda tur instancia lo traha hunto den un centro. E ‘one stop shop’ ta pa mucha, hoben of mayor por bisa cu nan mester tal ayudo pa un caso specifico, nan por ricibi e yudansa eynan.

Si un hoben/ mucha ta sufriendo violencia, abuso of maltrato, e departamento aki lo ta poni eynan pa un mucha por conta su storia un biaha cu tur departamento concerni presente. Y no cu e mucha tin cu conta 3 pa 4 biaha.

Departamento concerni manera polis, hospital, husticia, dokter, unda cu tur lo colecta e dato cu mester pa asina por tin husticia pa e caso. Segun Hernandez ta bisa esey ta un manera mas facil ‘cu keda pone cos apart’.

Nan ta wardando un localidad pa por organisa tambe un ‘family justice system’. E ta bisa cu tin ayudo di Hulanda pa lanta e sistema aki. E ta comparti cu nan ta bezig cu cosnan grandi pasando y por haya resultado pa poblacion por preveni casonan mas serio door di haya ayudo di trempan.

Otro plan cu lo sucede ta e ‘centro di cuido na San Nicolas’. A duna di conoce cu na Piedra Plat tin e opcion pa persona cu discapacidad of multiple discapacidad por biba na e centro y ricibi cuido 24ora pa dia. Esaki ta pa persona cu nan mayornan no por duna e cuido necesario, na e centro por duna esaki y sinti sigur.

A puntra Hernandez tocante e ‘one stop shop’ unda cu tin fundacion cu tin nan meldpunt manera Fundacion Sostenemi cu ta encarga cu caso manera di maltrato di mucha. E ta contesta cu den principio si pero no tur cos ta meld. Den e parti violencia lo hinca den proyecto pero tur instancia lo pone nan persona na e luga pa caso cu lo yega na ‘one stop shop’ pa tin ayudo.

E lo yega asina leu cu e centro lo mester ta disponibel pa 24 ora tur dia, mirando cu algun caso ta pasa den weekend of den ora anochi. “E ta logico cu mester ta henter dia habri, cu mester trahado social, psicologo, vertrouwen artsen pa tin evidencia forensico pa e caso bay hues pa asina tin condena.”

Hernandez ta enfatisa cu mester yuda pa evita cu mas caso den futuro. Nan ta bezig cu stakeholder di departamento di KIA, Reclassering, cu tur instancia cu tereno huridico manera ministerio publico, Unicef pa duna conseho pa con haci e tereno huridico ‘child friendly’.

Pakico ta haya esaki importante? Pa motibo cu mucha di 16 aña cu keda cera ta haya e mesun castigo cu un adulto. Anto e ta bisa cu esey no ta husto y no ta cay bou tratado internacional di mucha.

Un mucha ta keda mucha te cu su 18 aña y ora cu husga un mucha, departamento di Husticia pa yuda e mucha, pa papia cune y bin cu solucion ‘y no pa coh’e y tire entre hende cu tin criminalidad cu mucha den mal caminda’.

Nan ta keda bisa cu mester bin cu e parti di prevencion y ayudo trempan ‘algo cu nunca a haya atencion’. Pa e motibo aki ta bin cu e centro, pa asina duna atencion prome cu e situacion bira mas grave.

E di dos prevencion ta pa keda educa hoben cu ta sali for di scol, e sistema pa yuda nan den area di trabou of drenta scol bek. Ta importante pa educa y duna enseñanza pasobra no ta atende cierto exigencia.

Den bista di social crisis plan e ta bisa cu pa motibo ta keda pendiente pa importacion di hende, pa motibo cu e problema ta grandi, mester a cambia di servicio di proyecto crisisplan. E meta ta pa pone hoben den siguridad. Tin un lista di espera cu a wordo repasa. Hernandez ta bisa cu no por deshace e lista di spera di mucha pasobra ta e siguridad cu mester wak p’e y nan tin diferente proyecto.

“E manera di approach un problematica nos no ta traha manera proyecto di carrousel, pero a base pa traha profesional, educa y tin persona capacita na luga. Tin cierto profesional cu no por haya na Aruba cu ta un vertrouwen arts”, el a expresa.

Un vertrouwen arts ta e dokter cu ta traha e proceso forense y duna su dato pa un caso fuerte na OM. Actualmente no tin un dokter asina na Aruba, e specialisacion ta 4 aña despues di estudio di basis arts.

Cu un dokter forense, por haci caso na OM pa procesa e caso huridico pa por cana a base di evidencia medico. Asina tin na cla e sistema pa tur caso di famia cu ta vulnerabel den tur bario. Asina lo por wak unda e problema ta wordo confronta y por bin na un contesta, pa por preveni e bira grave y pa tuma contacto pa yuda nan trahando hunto cu tur otro instancia. E familu justice system ta un registracion di famia vulnerabel.

“E famia ta wordo yama hunto pa asina traha hunto cu e plan, pa por yega na un solucion di kico ta bay haci of ki ayudo mester di nan. Pero e plan ta keda den nan man, abo y bo famia tin cu traha cu e plan aki”, el a splica.