Departamento di asunto social: ‘Mester tene cuenta cu privacidad di personal’

ORANJESTAD – Departamento di asunto social a tene un conferencia pa trece informacion pa comunidad, cu nan ta traha di un manera profesional y al margen di ley pa yuda te unda nan por.

Vocero di departamento, Jesseline Soto Garcia – Kelly, a bisa cu den ultimo siman diferente caso a ser poni dilanti den medio comunicacion, unda cu un reportero a purba pone departamento di asunto social den luz negativo.

Sra. Kelly ta splica cu den situacion dificil cu presenta, sea problema menos agradabel of situacion financiero, ta pone cu cliente ta acerca DAS pa yudansa temporario, ‘sea guia psicosocial of den cuadro di ley den nos servicio’, nan ta yuda te unda nan por.

DAS no ta dispone pakete di cuminda, tampoco cas, pero ta traha hunto cu otro instancia concerni pa intermedia cu cliente. “E ta basa riba cooperacion di instancia.” E ta remarca cu no ta obliga instancia pa coopera. Nan ta haci nan parti y ta keda na instancia pa sa con hopi y leu por yuda e persona.

Director di departamento, Glenda Hernandez, a bisa cu ora ta trata den bida priva di personal, ta trata ‘patras di cortina’. “Mester tene cuenta cu bida priva di hende, pasobra ora abo saca bida riba pantaya, Aruba ta chikito, y nan lo corda bo pa esey”, sra. Hernandez a bisa. El a splica di e restriccion cu nan tin ora di duna ayudo social.

Nan ta cumpli cu cierto regla ora persona bin cerca nan, pa motibo cu tin un ley mara na nan. E ta splica cu nan no ta ‘free for all’. “Hende tin cu compronde cu ley ta unda placa di pueblo ta wordo uza pa duna persona cu problema social un sosten temporario.”

Sinembargo, ora persona ta keda na caya, sra. Hernandez ta splica cu ta bay tras di cortina pa wak e motibo pakico e persona a caba na situacion ey. E trahado social ta analisa pa wak con por traha riba e caso. Agregando cu nan ta dependiente di otro instancia. “Ta parti di bida y tarea cu tin cu haci, sin cu lastra un persona su bida priva riba pantaya.”

E enfoke pa e cliente ta pa soluciona su problema, sea adiccion of kico cu e ta, e tin cu admiti e problema pa por wordo soluciona. E ta bisa cu no por obliga hende pa soluciona problema di adiccion mescos gambling, alcohol y otronan, anto ta keda acumula problema.

“Nos trahado social ta traha cu plan, con ta traha bon den desaroyo pa trata cu problema. Nos no tin duda riba nos trahado social. Lamentablemente, nomber di trahado social a wordo lastra di e forma ey, nan ta traha duro tras di cortina. Nos ta pidi pa por fabor tene comprension y tene cuenta cu nan privacidad”, sra. Hernandez a bisa.

Sra. Hernandez tambe a bisa cu hende ta puntra pa kico e Crisis Social Plan ta. E ta contesta cu e plan ta enfoca riba sistema di proteccion pa mucha, pa por soluciona problema riba tereno di abuso fisico y sexual den mucha, hoben y mayornan cu tin e tarea, y no pa tur cos cu ta pasando na Aruba.

Haildy Castaño, trahado social di departamento di asunto social, ta splica cu ta atende cu problema social di tur parti, sea di con pa anda cu placa, escogencia den bida diario, sostene pa haya un miho bista y habilidad pa anda.

Den caso cu ta necesario pa traha cu otro instancia, ‘esey hopi biaha ta con nos ta traha’, e problema cu yega cerca nan ta problema compleho, unda cu e cliente mester ripara kico ta yuda su mes cune. Interno cu bijstand, externamente cu otro instancia manera FCAA, sostenemi, voogdijraad.

E ta splica cu nan ta sinta na mesa cu tur instancia pa traha plan di guia y pa duna tarea. E trahado social ta para hunto banda su cliente, pa cana e proceso pa situacion mehora. “Tin laso estrecho cu tur instancia, pasobra awendia ta dificil pa yega na solucion sin traha hunto.”

Nan ta wak e raiz di e problema. E ta tuma tempo y esfuerso di ambos banda. Den caso cu e persona cay, nan ta acerca pa anda cu e situacion tras di cortina, pa e persona keda trankil pa sigui e caminda. Sinembargo, sra. Castaño ta bisa cu comunicacion cu cliente ta importante.

E duracion pa yuda hende ta depende di e caso. “Hopi hende ta anda cu diferente problema, cu por tarda varios luna pa regel algo temporario. Nos ta logra pa famia habri porta bek, pero si ta situacion dificil, wak con leu, pa asina traha stabilidad pa e tin dak, tiki placa y tiki cuminda, depende e situacion.

Bon Dia Aruba a puntra tocante cierto persona cu nan mes ta busca pa no tin trabou, e persona mes ta iresponsabel, of e famia ta cera porta pa nan, si nan ta haci check up si di berdad e persona ta den e problema social.

Sra. Castaño ta bisa cu e parti di investigacion, nan ta papia cu tur hende pa logra famia habri porta pa e persona no ta riba caya. Nan ta tende ambos banda. “Informacion y combersacion mester ta mas habri posibel, pasobra esey ta unico manera cu por trece e solucion dilanti, simplemente duradero. E berdad riba mesa.”

E grupo vulnerabel, zwak, no ta chikito. Persona cu ta pasa den varios problema hunto. E ta agrega cu posibilidad a bira menos. Nan ta yega e departamento cu problema compleho. E persona no ta anda bon cu placa, ta prefera gasta den material en bes di cumpli cu su responsabilidad. E ta bira un custumber y crea mas problema. Pa finalisa, e ta bisa cu por tarda cu problema y no ta soluciona di un dia pa otro.