Departamento di Asunto Economico, hunto cu nan unidad di Exprodesk, a organisa e workshop ‘conkistando horizontenan nobo’ den colaboracion cu Sismercado, Grant Thornton, Asociacion di Musico y Artista Arubano, Derecho di Autor (Trademarks y Patents), Qredits, CXpay pa presenta Business Week 2019.
Sharon Meijer, policy advisor na departamento di Asunto Economico a duna splicacion tocante Exprodesk su tayer ‘eCommerce’ unda e esunnan cu atende por a siña con pa bende nan producto online, con pa ricibi e pago online, y tambe con pa proteha esaki unabes e bay online.
Cada participante a ricibi 9 tayer durante henter un siman. Tres dia intensivo di eCommerce, tambe informacion di con pa traha un website simpel, con pa deal cu trafico riba e website y con e producto por wordo bendi y ta mas atractivo online.
A trata e parti di con pa cumpli cu belasting, locual ta trata e reforma nobo di belasting, y e importancia pa un negoshi na Aruba ta exitoso. Pa esunnan den arte, sea fotografo, media entre otro, tambe pa nan por tin nan derechonan di autor. Den e parti di proteha y patenta e producto te cu e logo di e compania pa ora e bay digital.
Ademas nan a haya e parti practico, unda cu un persona cu interes pa habri negoshi por a habri nan website mesora. “E parti great ta cu nos tabatin un persona cu tabatin su website caba, el a duna su presentacion y e producto a wordo bendi”, el a remarca.
Un grupo varia y di diferente edad, segun Meijer, tin cu tabata tin website caba y otro cu kier a traha simpel. Algun persona cu conocemento den transaccion y con pa bende nan producto y servicio, te hasta esunnan cu nunca a haci esey. Nan a ofrece material necesario pa yuda nan cu esaki.
El a informa cu lo tin mas tayer di eCommerce. “Mundo ta bayendo den esaki. Tambe loke ta trata e parti logistica ta importante con pa ship esaki ora di manda afo y pa entrega na su destino final.”
Nan ta duna informacion y guia necesario, y e tayernan ta gratis. Pa e siguiente tayer lo trata pa hende cu a cuminsa un negoshi cu no ta exporta ainda, y con pa siña haci esaki, e logistica di cual documento mester tin y mas informacion. El a expresa cu entusiasmo di un grupo cu ta satisfecho, cu interes pa haci pregunta y siña y ta interactivo, a haci ‘un siman interesante y exitoso’.
Na final di evento, ministro Xiomara Ruiz-Maduro a haci entrega di certificado pa cada participante. “Como gobierno nos ta gusta mira actividad economico manera esaki crece. Sea chikito of mediano, nan ta yuda economia di Aruba. Ta spera di wak fruto muy pronto. Tambe pa desaroya e sector prometedor y industria creativo ta un deseo grandi cu mester enfoca riba dje.”
Pa finalisa, e mandatario a duna un palabra di gratitud na esunnan cu organisa y colabora den e tayer. Pa haci uzo di nan capacidad, talento y conocemento adkiri pa yuda comunidad henter.
