Departamento di Aduana ta splica ariba e proceso di ‘Vrijmaking’

Vocero Departamento di Aduana Marilyn Wout a reuni hunto cu mas miembronan pa duna informacion tocante di e trabounan cu ta sosode na afdeling Vrijmaking dialuna mainta y kico cliente mester cumpli cu ne.

Segun aduana, pa un cliente por pidi servicio di un duana ambtenaar, e lo tin di cumpli cu lo siguiente: Brokers mester haci peticion pa haya servicio di un douane ambtenaar di dialuna pa diabierna pa habri container y mester percura pa tin tur papel na ordo (aangifte, factura y permiso di importacion y rechten mester ta paga). Na momento cu e cliente cumpli cu e puntonan, e klantcoordinator lo registra e peticion den e schedule y un duana ambtenaar lo wordo asigna. Si e cliente no tin e papelnan cla e lo perde su turno, te na momento cu e tin tur su papelnan den ordo.

Terreindienst ta acapara tur trabounan cu por wordo haci mas lihe cu tin relativamente menos risico. E empleadonan cu ta haci terreindienst ta pasa eherce su control y esaki ta bayendo hopi bon segun sra. Wout. E ta bayendo asina bon cu ta hayando iregularidad cu ta genera “bijbetaling” cu hasta por bira un proces-verbaal. Departamento di Aduana tin un container scan na e waf di Barcadera cu ta un herment fructifero cu tambe ta facilita e proceso di release container y tambe ta dunando su frutonan.

E VCP program ta un “Voluntary Compliance Program” cu ta duna un trato preferencial na clientenan cu ta forma parti di e programa aki. Cu esaki Departamento di Aduana ta pone como meta pa completa verificacion di e aangifte y e proceso di Vrijmaking dentro di 24 ora. Na e momentonan aki e VCP ta “on hold” pa evaluacion. Banda di cumpli cu e leynan Departamento di Aduana ta enforsa sigur pa brinda e clientenan un miho servicio. Pa e motibo aki Departamento di Aduana a zorg pa bin cu e Douane Declaranten Cursus. E curso aki ta importante pa clientenan por siña con pa haci yena nan aangifte debidamente y esaki ta trece cun’e cu duana lo traha mas eficiente unda e proceso di Aduana lo cana mas lihe. Segun sra. Wout, e meta di Departamento di Aduana ta pa traha stimula economia y no stagna e economia.