Un siman despues di e candela grandi di e dump ilegal na Tamarijn cu a core cu habitantenan den e bario for di nan cas, nan a reuni cu minister di Husticia, parlamentarionan, Cuerpo Policial y otro bisiñanan. Un grupo di ciudadano ta laga sa tambe cu nan ta lanta un denuncia contra e doño y lo pidi compensacion pa e dañonan.

Un di e habitantenan Luc Alofs ta conta nos cu diasabra e bario di Tamarijn tabata tin un encuentro cu varios hende di e bario y otro barionan tambe. Polis y minister di Husticia Arthur Dowers tabata presente tambe. “Minister a laga nos sa cu el a splica e exploitant di e tereno cu e ta actuando ilegal pasobra e no tin permiso pa haci e trabao cu na final di dia a causa tur e molester,” sr. Alofs ta bisa.  Minister tambe a splica segun sr. Alofs, cu e ta bay reinstitui un comision cu mester percura cu e ehecucion di nos leynan na Aruba ta tuma luga. “Nos ta hopi contento cu esey. ” Minister tambe a menciona segun sr. Alofs  cu e kier pa e doño yena e tereno na un manera controla, pa sa exactamente kico ta bay den dje y kico no.

Denuncia y caso civil
E habitantenan a bishita polis siman pasa tambe y entrega un denuncia na polis. Sr. Alofs:  “Polis a bisa nos cu nos como ciudadano por entrega un keho. Nos a splica tur hende, minister, parlamentarionan , bisiñanan, cu ta trata di un keho contra e doño y tambe e exploitant di e tereno pasobra aparentemente nan ta dos diferente hende.”

E habitantenan tambe lo entama un caso civil contra e doño y esun cu ta exploita e tereno pa daño. “Nos ta spera cu aki 10 aña nos tin un Aruba unda bo kier biba, lanta bo yiunan y pasa bo vakantie feliz manera nos tur kier.  Na e di dos luga por ehempel nos bisiña Fabia Croes a haya hopi daño y gastonan halto. Gastonan cu ta echt e consecuencia di tur e molester anto nos ta bay pidi ‘schadevergoeding’  di esnan cu a causa tur e daño,” sr. Alofs ta bisa.

Ainda no por drenta cas bek
Bon Dia Aruba a combersa un rato cu habitante Fabia Croes cu ta bisa cu e ta kedando cerca un familiar pasobra te ainda e no a bay su cas pa drumi desde siman pasa. “Diasabra nos a cuminsa haci limpi despues cu e holo a cuminsa bira menos. Tres hende homber y tres dama a bin yuda nos haci limpi parti paden. Mi ta calcula cu nos por drenta diamars of dialuna anochi mes mi ta spera pa bin drumi akinan bek,” sra. Croes ta conta.  

E cas aki ta situa algun meter leu for di e dump anto ta un di e casnan cu e huma a pega directamente na dje. Sra. Croes: “Nos tin hopi cos cu nos a cumpra cu nos mester benta nan afo. Nos freezer den e patio cu yen di cuminda cu nos a caba di cumpra, riba conseho di Salubridad Publico, nos mester benta tur afo. Tur cos den frishider tambe mester benta afo pasobra e huma a penetra den tur cos.”  

Na 2012 manera cu nos a informa caba, e habitantenan aki a pasa den mescos y tabata tin casi 3.000 florin na gasto. Aworaki cu nan mester bolbe benta tur cos afo y paga hendenan cu a bin haci limpi. sra. Croes ta conclui: “Ami a bisa cu mi no kier scucha papiamento bunita mas. Pasobra den 2012 tabata tin asina hopi palabra bunita cu tur sorto di cos y toch no a logra. Nan (gobierno) ta papiando di un comision for di 2012 cu nunca nos tabata sa di dje. P’esey nos como bario a pidi pa conoce nan y tene contacto cu nan anto si nan no cumpli pa nos trek na nan horea. Pasobra ta anos ta esunnan cu ta sufri.”