Dentista Hendrik Marsman a haci otro denuncia: “Tin dos dentista cu ta trahando como orthodoncista y nan certificado ta cuestionabel”

Ayera mainta, dentista Hendrik Marsman, cu den pasado a yega di denuncia otro dentistanan cu tabata traha como specialista y ta bin treciendo dilanti su preocupacion pa cuido dental na Aruba, a duna un conferencia di prensa pa papia di dos caso mas.

El a señala cu esaki ta un situacion dificil unda Gobierno di Aruba mester coregi su foutnan di pasado, indicando cu tin indicacion fuerte cu dos dentista ta trahando como specialista y cu nan certificado ta cuestionabel. “Supuestamente nan ta riba prueba den e ARUBIG, esta un sorto di “visitatie traject”. Pero hecho ta cu si ta asina, cu ta 3 dentista a traha na Aruba como specialista di beugel. Pues ta traha y cobra como specialista sin cu nan tin e studio universitario como orthodontista.”

El a trece dilanti un caso specifico di un pashent di 16 aña cu beugel, na unda el a informa cu AZV y e mama a paga henter e tratamento. “Ee pashent su cara a desforma, e bite a habri mas ainda y e ariba y abao no ta pega bon riba otro. E tin problema cu guli y ta hala rosea door di su boca. Splica mi con e mucha aki por bay kauw su cuminda bon? Tin problema pa presenta asina den bida social, por ehempel awor como teenager pa invita un chick.”

El a bisa cu e caso aki ta di mala praxis severo y a desforma e pashent su cara y door cu e tratamento ta dura mas cu tres aña, e ta perdiendo e raiz di e djentenan. “E pashent aki ta falta ainda 12 luna di tratamento y si kier drecha su cara of mordi completo, e mester opera su kaak y esaki mester a bisa na e pashent for di comienso,” Marsman a señala.

Den e caso aki el a informa cu mayornan a confia den un specialista y nan no sa kico pa haci. El a comenta cu ta imposibel cu e calidad mester ta controla door di e mayornan cu no a studia pa e area aki di cuido y cu nan no sa ken ta bay para responsabel pa e daño causa na e hoben aki of ken ta bay paga su operacion di kaak.

“AZY y Gobierno cu ta tolera esaki door di laga e specialistanan aki sigui traha cu contract? P’esey mi ta haci mi denuncia publico, pasobra e indicacion ta parce cu dentista cu no sa su limite y gobierno ta lag’e traha como specialista. Kico abo como mayor lo haci si bo haya sa cu e trato cu bo yiu a haya den 3 aña, despues di a paga entre 6mil pa 7 mil florin y cu mester sigui pa otro tempo mas y hasta haci un operacion na Hulanda?” Marsman a cuestiona.

Pa finalisa el a referi na instancianan concerni pa tuma pasonan necesario den e caso aki y na unda el a enfatisa cu cuido dental na Aruba mester di un cambio.