Densay Hernandez: “Mi ta kere na Aruba mi por yuda mas cu djis mi mes. E ta bay pa yuda e isla”

Densay Hernandez ta un hoben entrepreneur cu recientemente a bolbe Aruba, unda su intencion ta pa usa su conocemento pa yuda avansa negoshi na nos isla. Bon Dia Aruba a combersa cu Hernandez tocante creatividad, data, entrepreneurship, y mas.

Densay Hernandez di Denzo Designs and World Marketing a biba 15 aña na Hulanda, unda el a haci su estudio na Hogeschool Utrecht den International Communication and Media. Durante su estudio el a haci un minor den Entrepreneurship for Emerging Markets. El a conta cu su minor “tabata hopi specifica riba con bo ta traha den un ambiente di negoshi cu no tur cos ta regla pa bo.” Y esey el a haya hopi interesante, mirando cu na Aruba, maske algun areanan ta bon desaroya, no tur cos ta asina ainda, “y bo mester sa con pa desaroya e negoshi den e ambiente ey,” el a bisa.

Despues di gradua, el a cuminsa un “growth hacking academy.” Un “growth hacker” ta un combinacion entre coding y marketing. “Bo tin habilidadnan tecnico y bo tin e aspecto di marketing, ta combina ambos pa traha un trabao mas diferente.” Hernandez ta splica cu pa sa tur dos banda, ta duna un miho bista riba e diferente disciplinanan pero tambe con pa yuda e cliente miho. “Eynan mi a keda introduci na e escena di startup di Amsterdam. Mi a traha na TQ Amsterdam, unda tin yen startup, yen scaleup.” Pero e experiencia aki a mustr’e cu e tabatin mester di siña di un compania estableci prome, y asina a bay traha cu un agencia, Loyals, cu despues a bira Loyals Group, un di e agencianan mas grandi di Hulanda. “Mi a maak mee henter e crecemento aki cu nan. Mi a cuminsa como Junior SEO specialist, eigenlijk growth marketer tambe, y eynan mi a traha cu mas di 300 cliente, di Hulanda, Aruba, Surinam, Corsou, Merca, desde compania chikito te multinacionalnan grandi.” E experiencia aki, creciendo hunto cu Loyals, a yud’e identifica hopi “growing pains” cu awor ta haci cu e por identifica esakinan den otro compania.

Loke a pon’e bin Aruba, ta cu e tabata kier start su propio compania. “Esey tabata mi soño. Pues despues di traha mas cu ocho aña, casi yegando 10 caba den e industria aki, awo mi ta cuminsando riba mi mes.”
Y e ta treciendo algo cu na Aruba no tabatin mes.

“Mi manera pa yuda e isla ta door di haci data mas interesante. Pakico data ta asina importante? Mi ta sinti cu tin un falta di data na tur compania na Aruba y por ehemplo na Hulanda, tur cos ta bay tocante data, asina ta funciona. Si un decision tabata bon of no, nan por bisa ‘ah e data ta bisa esaki of esaya.’ Na Aruba no tin esey.” Hernandez ta agrega cu esey ta un punto pa hopi entrepreneur. Den ultimo añanan cu el a bin bay Aruba, el a sinta na mesa cu hopi entrepreneur pa saca afo kico ta importante pa nan. “Mi a menciona nan un par di herment cu mi ta usa na Hulanda, nan nunca a tende di nan, dus esey ta bisa bo hopi cu nan no ta usando data.” Cu nan no ta usa data ta nifica cu e negoshi ta bay bon, ta crece, pero no sa pakico precies. Hernandez ta boga pa comerciantenan na Aruba cuminsa usa data pa identifica ki servicio y producto ta esunnan cu ta treciendo placa, pa asina por tuma miho decision di negoshi y pa e compania crece mas lihe. “Hopi di e hermentnan ta gratis. E inversion pa un hende bin analisa nan ‘customer journey’ y set e up ta un solo pago. Y despues por siña maneha e hermentnan bo mes,” el a agrega.

Hernandez su experiencia despues di caba su estudio talbes ta uno cu hopi hoben na Aruba por identifica cune, den e hecho cu no tabata facil pa haya un trabao den e ramo di su estudio. “Mi a caba di studia, mi no por a haya trabao, tabata hopi dificil pa haya trabao. Pues despues di como un aña ta busca – pasobra mi echt tabata kier a traha den mi ramo – mi a haya e growth hacker academy.” Pero e academia mes tabata un reto, pasobra mester a traha hopi ‘fast-paced’, hopi intensamente, y biba cu masha tiki placa. “Basicamente mi tabata biba riba bonchi cu aros pa seis luna, y unabes mi a pasa esey, mi a haya mi prome trabao hopi bon paga, anto cla!” E les cu por siña di esaki ta cu pa por logra, mester ta creativo den busca solucion, ta dispuesto pa sacrifica y traha duro, y keda determina pa bo logra. Ademas, mester corda cu “bo estudio nunca ta caba,” pasobra ta bin desaroyo nobo, hermentnan nobo, y e manera di traha ta cambia y mester adapta y keda crece.

Maske cos tabata bayendo bon na Hulanda, Hernandez ta un persona cu tin un vision y sa kico e kier logra. “Mi a bin [Aruba] prome den Covid pa periodonan mas largo. Bo ta bin den contacto cu bo famia atrobe – e tabata un temporada hopi dificil na Aruba, mi a ripar’e. Pasobra mi a bin prome cu Covid y tabata bayendo hopi bon, tur cos tabata, den mi opinion, miho cu mi a lag’e den un sentido. Pero despues durante Covid, mi a mira hende ta pasa problema y tabata dificil. Mi ta kere despues di esey, mi a haya e idea cu mi tabata kier cuminsa mi propio compania, y mi a dicidi pa hacie na Aruba, pasobra mi sa cu na Aruba no tine. Mi ta kere na Aruba mi por yuda mas cu djis mi mes. E ta bay pa yuda e isla. Y ami no kier pa e conocemento aki keda na ami, mi kier pa e conocemento di data bay mas. Dus tin suficiente, tur compania por us’e, mi no por hacie riba mi mes.”

Y asina Hernandez a yega na e programa di Incubator di ImpactHub, Universidad di Aruba y Camara di Comercio, hunto cu minister Geoffrey Wever. El a usa e programa aki pa su startup. Idea di e programa tabata pa den un luna y mey mas o menos ta haci workshop intensivo cada dia riba diferente aspecto di negoshi, por ehemplo accounting, belasting, business set up, etc. “Bo ta haya diferente profesional of entrepreneur di e isla pa comparti nan conocemento pa un bon prijs pa un programa bon hinca den otro.” El a bisa cu e programa a siñ’e mas know-how local cu e no tabatin na Hulanda. Y ademas, el a gana un di e premionan. “Idea tabata cu un luna y mey bo ta cuminsa cu tayer, y e ultimo tayer ta tocante ‘pitching’, mester a pitch dilanti un hurando.” Un mentor a yud’e cu su presentacion. “Bo ta presenta dilanti e hurando bo idea, bo business plan y kico bo kier logra den proximo añanan. Mi a haci esey, y mesun anochi ta haya resultado. Mi a gana e prome premio! Mi a gana e ‘Most Innovative Company Award.’”

Su industria ta rekeri hopi creatividad, y pa mantene esaki, Hernandez ta gusta haci diseño. Pero tin un arma secreto pa esaki tambe: e ta colabora cu su pareha, artista local Jess Wolff, den e colectivo artistico Much’i Mondi. “Esey ta full un otro cos cu mi ta haci, cu ta manera mas trece artista, evento, traha flyer, cosnan asina cu ta mas creativo den e sentido aki. Mi ta kere esey tambe ta yuda mi keda cu mi creatividad.”