Siman pasa mi por a tuma nota di varios plan nan pa energia alternativa pa Aruba. E plan nan aki ta di aplaudi mirando cu nan lo ta na bienestar di Aruba. Lastimamente no por confia den e proyecto nan aki di parti di e gobierno aki di Sra. Evelyn Wever-Croes.

Durante Gabinetenan di Sr. Mike Eman, pueblo a mira masha hopi progreso riba tereno di energia alternativa. Aruba tabata lider den Caribe cu un proyecto tras di otro di energia renovable. Mi por corda con Sra. Wever Croes a bringa e proyecto di molina na Urirama cu tabata parti di e plan di Mike Eman pa yega 100% di energia renovable hunto cu e parkenan solar. Supuestamente e tempo ey molinanan di biento lo ta malo pa salud di hende, mahos pa e medio ambiente y tambe lo stroba hende di haci oracion na kapel di Alto Vista. Ora cu Gabinete Wever Croes a sinta y a para tur cos pa 5 aña.

Ta pakico e cambio awor un cambio drastico di pensamento?

Ora para keto un rato y wak cual ta e desaroyo cu tabata tin tras di e paramento di e proyecto nan energia alternativo e tempo aya. Por ripara cu tur e proyectonan aki a wordo para a base di casonan den corte pa un cierto grupo di hende liga na e gobierno actual. Banda di e grupo ey, ta un cierto grupo di abogado cu tambe tin laso cu e gobierno actual ta esnan cu a hiba e lucha nan aki den corte y asina a beneficia financieramente grandemente a costo di nos pueblo. Awe ta net e mesun hendenan aki ta bin dilanti y ta anuncia exactamente e mesun proyecto nan pa cu energia alternativa banda di desaroyo di e tereno di e rafinaderia cu nan a para den pasado. E pregunta ta e ora, dicon ora di un gobierno di otro signatura e proyecto no ta bon pero awe si. Pero esaki ta nan forma di corupcion den forma di auto-enriksimiento. Nan a bringa pueblo y gobierno den pasado y por medio di haci uso di buraco nan den nos leynan awe ta presenta e mesun proyecto nan aki. No ta por nada por wak tata, yiu, prima y amigonan cu ta rondona e gobernantenan actual cu ta bakia den ley, ta na posicion nan clave. Pa añas e hende nan aki a bin ta mal usa y probecha di nos sistema di leynan pa awe nan corona nan mes.

Cueste loque cueste nan mester a para proyecto nan “green” den pasado. E echo nan aki por cataloga nan como abuso contra pueblo. Abuso pasobra ta pueblo ta sufri ora cu WEB y Elmar mester hisa prijs di coriente, tanten cu si e molina nan a bin e tempo aya, e prijs por tabata mas stabiel na Aruba. Un otro ehempel di corupcion por medio di auto-enrikecimiento ta e contract nan cu Eagle LNG. Kico a para cu e deal aki caminda tin hopi cosnan dudoso y famia envolvi den dje.

Nos no por tuma e gobierno actual na serio. Cada dia ta birando mas obvio cu e mascarada di e ministernan actual ta cayendo. Pueblo por wak cu den pasado nan a hunga wega politico, causando sufrimento den pueblo y pa awe nan bin hunga grandi. E mesun gobernante nan di awe a priva pueblo di tin un prijs di energia stabiel fo’i promer cu e pandemia y e guera di Ucrania. Awe ta hustamente e gobernantenan aki di gabinetenan di Sra. Evelyn Wever-Croes, cu ta pone pueblo sufri subida den prijs di awa y coriente, kier bin tira santo den wowo di pueblo. Nan djis kier keda na poder pa nan por sigui cu nan forma nobo di corupcion: auto-enriksimiento mal usando nos sistema di ley pa cu proyecto nan di energia alternativo.