Diaranson ultimo tabata un dia di hopi scur y di mal contento pa ciudadanonan di Corsou. Trahadonan di Selikor a dicidi di haci un marcha pa motibo cu nan ta contra di entrega di 12.5% di nan salario, cu Hulanda a pidi como condicion pa Corsou haya un prestamo, loke a causa varios protesta y olanan di violencia na momento cu e manifestantenan a yega na Forti.

Bon Dia Aruba a haya un entrevista exclusivo cu Encho Henrique, un di e protagonistanan cu a resalta mas den e protesta hunto cu Lon Mutueel na Corsou. El a conta con e situacion a cuminsa y con a desaroya. Henrique a expresa cu desde algun tempo caba Gobierno di Corsou ta haciendo un mal trabou.

El a informa cu gobierno ta tumando medidanan riba nan mes: A kita 400 trahado for di refineria Isla, loke ta nifica cu no ta worry mes cu comunidad. Pa e motibo ey nan a subi caya pa splica cu minister presidente Eugene Rhuggenaath mester entrega su retiro. Loke nan ta pidi ta pa haya un eleccion nobo.

Di mesun manera, el a enfatisa cu e resultado di loke a tuma luga diaranson ultimo no mester a bay di e manera ey. E situacion tabata bou control for di comienso, pa motibo cu polisnan tampoco a cobra nan salario y nan tabata para banda di e protestantenan pa apoya e causa. Na momento cu Vrijwilligers Korps Corsou (VKC) a presenta, e situacion a cambia y a cuminsa tira gas, loke a causa rabia den e personanan cu tabata den e protesta.

Pa e motibo aki, segun Henrique a comunica, hefe di polis di Corsou, Mauricio Sambo a entrega su retiro, ya cu e no tabata conforme na e manera cu cosnan a caba y cu for di comienso, manera a keda conoci, e situacion tabata bou control.

Ademas, el a bisa cu nan no ta di acuerdo cu loke Gobierno di Cursou a bin haciendo y cu no tin relacion cu e crisis di coronavirus.

Tambe a keda conoci cu un di e personanan cu a resalta den e protesta hunto cu Henriquez, ta Lon Mutueel, ken a wordo deteni diaranson den oranan di anochi. Segun Henrique, Mutuuel via un Facebook live a bisa su siguidonan pa nan sigui cu e protestanan. Tocante esaki, ayera tardi a keda confirma pa via di su abogado cu e detencion di Mutueel a wordo prolonga.

Henrique a trece dilanti cu e y un grupo mas tabata den un lucha sano, sin menasa y sin problema.

Tambe el a declara pa Bon Dia Aruba su mensahe, cu segun e ta conta pa Corsou, Boneiro y Aruba, cu e islanan mester ta uni. “Si nos ta uni, hopi cosnan asina no lo tuma luga, pa via cu ta nos a pone e gobierno eynan, nan no por bay contra nos. Si un persona a perde su trabou e tin cu bin y join e lucha, pa motibo cu si bo a perde esey, bo a perde tur cos caba. Si un persona ta keda paden, e situacion ta bira pio, pasobra cu esey bo no ta mustra cu bo ta rabia,” Henrique a menciona.

Tambe el a señala: “E situacion tabata pa mustra nan mal contento, pero sin violencia, pa mañan no lo bisa cu no a intenta loke a wordo haci diaranson.”

Faltando algun luna pa eleccion tuma luga na Corsou, specificamente na maart 2021, Bon Dia Aruba a puntra si esaki ta un momento pa warda te dia di eleccion of no. El a contesta cu e situacion ta asina delicado cu tin hopi pobresa na Corsou y cu no ta yega te na maart di otro aña. “Sin coronavirus e situacion tabata dificil, criminalidad ta hopi halto, awor mas hende ta bay cas, e cos aki ta bira pio”, el a sigura.

Tambe a keda conoci cu toque de queda a wordo implementa pa Ministerio di Husticia desde diaranson ultimo den oranan di anochi, for di 9or te cu 6or di mainta na henter isla te cu proximo aviso.