Pais sin tradicion di protesta manera Colombia, e welga nacional dia 21 di november 2019 tabata historico.
E welga tabata convoca principalmente pa e central di obrero, pero a converti den un protesta contra e reforma di pension, laboral y educativo, tambe na fabor di acuerdo di paz firma pa e Fuerzas Armadas Revolucionarias de Colombia (FARC).
E poblacion a uni pa mobilisa contra e poder estableci, awe materialisa cu presidente Ivan Duque, aliado di ex-presidente Alvaro Uribe kende den un intento di ta modera, a genera rechaso entre iskierda y derecha.
Na medida cu e manifestacionnan na Ecuador, Chile y Bolivia a aumenta, a laga un decena di hendenan fayecido y a genera importante cambionan politico, e expectativa entre e welga di Colombia a tuma e agenda nacional durante varios dia.
Gobierno a militarisa parti di e pais, a encera ehercito, cera frontera y a otorga facultadnan pa gobiernonan local pa ‘mantene e orden’; tambe a produci allanamiento; e partido di Gobierno derechista Centro Democratico a alerta pa e supuesto intromision di gobiernonan chavista.
Y manera a pasa den protestanan di Latino America y rond mundo, den e welga tabatin disturbio, sakeo, daño pa infrastructura publico y abuso di forsa di parti di autoridadnan.
Minister di Defensa, Carlos Holmes Trujillo, ayera a informa cu autoridadnan a confirma e fayecimento di tres persona na Valle del Cauca, pero a indica cu ainda nan ta verifica e circunstancia den cual esaki a tuma luga.
Ta probabel cu historia lo recorda e welga nacional di 21 di november na Colombia como e dia cu e Colombianonan, un poblacion trauma pa un conflicto arma di 60 aña, a mustra disposicion pa sali riba caya. A pesar di awa cu a yobe. A pesar di represion.
